Bu gün akademik, əməkdar elm xadimi, Milli Aviasiya Akademiyasının rektoru Arif Paşayevin ad günüdür.   Veteran.gov.az xəbər verir ki, Müharibə, Əmək və Silahlı Qüvvələr Veteranları Təşkilatının Rəyasət Heyəti bu münasibətlə Arif Paşayevi təbrik edib. Təbrikdə deyilir:   “Hörmətli Arif müəllim. Sizi ad gününüz münasibəti ilə təbrik edir, Sizə uzun ömür, cansağlığı, elmi fəaliyyətinizdə yeni-yeni uğurlar arzulayırıq. Əminik ki, hər zaman olduğu kimi bundan sonra da, dəyərli elmi əsərləriniz və ixtiralarınızla ölkəmizdə elmin və təhsilin inkişafına böyük töhfələr verəcək, doğma Azərbaycanımızı beynəlxalq elmi konfranslarda, mötəbər elmi təşkilatlarda uğurla təmsil edəcəksiniz. İftixar hissi ilə qeyd edirik ki, Siz hər zaman zəngin elmi fəaliyyətinizi davam etdirməklə yanaşı, təcrübəli pedaqoq və elmi rəhbər kimi ölkəmizdə yüksək intellektə malik gənc kadrların hazırlanması prosesinə də böyük dəstək vermisiniz, dövlətimizin savadlı, dünyagörüşlü və vətənpərvər milli kadrlarla təmin edilməsində mühüm rol oynamısınız. Sevindiricidir ki, Sizin bu müqəddəs missiyanız bu gün də uğurla davam edir.   Sizi bir daha ad gününüz münasibəti ilə təbrik edir, Müharibə, Əmək və Silahlı Qüvvələr Veteranları Təşkilatı adından ən xoş arzularımızı bildiririk”.   Hörmətlə, Müharibə, Əmək və Silahlı Qüvvələr Veteranları Təşkilatının Rəyasət Heyəti adından  Fatma Səttarova və  Cəlil Xəlilov  

Respublika Veteranlar Təşkilatı  Azərbaycan Respublikası Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə “Yeniyetmə, gənc və universitet tələbələri arasında vətənpərvərliyin təbliği ilə bağlı görüşlərin keçirilməsi” layihəsinin icrasına başlayıb. Layihə 3 ay müddətində ( avqust- oktyabr) Bakı şəhərində həyata keçirilməyi nəzərdə tutulur. Layihə Qarabağ müharibəsində və Aprel döyüşlərində qəhrəmanlıq göstərmiş oğullarımız, hərbçilərimizin həyatından və döyüş yolundan bəhs edir. Layihə müddətində yeniyetmə və gənclərlə, universitet tələbələri ilə görüşlər keçiriləcək. Görüşlər zamanı vətən sevgisi, vətən uğrunda canında keçmiş qəhrəman oğullarımızın keçdiyi həyat və döyüş yollları barəsində müzakirələr aparılacaq, Qarabağ və Aprel döyüşləri şəhidlərimizin, vətənimizin qəhrəman oğullarının xatirəsi yad olunacaq və onların barəsində yeniyetmə və gənclərlə maarifləndirici söhbətlər aparılacaq, görüşlər təşkil olunacaq. Layihənin əsas mahiyyəti Azərbaycan övladlarının keçdiyi şərəfli həyat yolunun yeniyetmə və gənclərə daha yaxından tanıdılması, onlarda xalqına, dövlətinə sədaqət, tarixinə hörmət, vətənpərvərlik ruhunun gücləndirilməsi, həmçinin onlar arasında milli-mənəvi dəyərlərimizin, dövlətçilik ənənələrimizin təbliği istiqamətində dövlət orqanlarının apardığı işə dəstək verilməsidir. Layihəni həyata keçirməklə müasir gəncliyimizə vətənpərvərlik hisslərinin daha dərindən aşılanmasına nail olmaq, eyni zamanda yeniyetmə və  gənclər arasında heç bir tərəddüd etmədən  vətən uğrunda şəhid olmuş qəhrəman oğullarımızın vətənpərvərlik hissləri və vətən sevgiləri təbliğ olunacaq.

Azərbaycan xalqı Vətən Müharibəsində həyatlarını ərazi bütövlüyümüz yolunda qurban vermiş şəhidlərimizin əziz xatirəsini bir dəqiqəlik sükutla yad edib. Bu münasibətlə bütün ölkə ərazisində hərəkət dayanıb, maşınlar siqnal, hərbi gəmilər fit verib. Allah şəhidlərimizə rəhmət eləsin!   12:00 Azərbaycan canlarını ərazi bütövlüyümüz uğrunda fəda etmiş Vətən Müharibəsi şəhidlərinin əziz xatirəsini bir dəqiqəlik sükutla yad edir. Anım Prezident, Ali Baş Komandan İlham Əliyevin Vətən Müharibəsi şəhidlərinin xatirəsinin yad edilməsi haqqında sərəncamı çərçivəsində baş tutur. Qeyd edək ki, 44 günlük Vətən Müharibəsinin ölkəmizin tarixindəki misilsiz yerini bir daha təsbit edən bir sıra sərəncamlar imzalayıb. Sərəncamlara əsasən, hər il sentyabrın 27-si ölkəmizdə Anım Günü, Qarabağın incisi Şuşanın düşmən tapdağından azad edildiyi gün – noyabrın 8-i isə Zəfər günü kimi qeyd olunacaq. Bundan başqa, Prezident İlham Əliyev Bakı şəhərində Vətən Müharibəsi memorial kompleksinin və Zəfər muzeyinin yaradılması haqqında sərəncam imzalayıb. Vətən Müharibəsi memorial kompleksi və Zəfər muzeyi Azərbaycan xalqının Vətən müharibəsində göstərdiyi misilsiz qəhrəmanlığın və qazandığı möhtəşəm tarixi zəfərin nümayiş etdirilməsi, şəhidlərimizin əziz xatirəsinin əbədiləşdirilməsi məqsədilə yaradılacaq. Xatırlatmaq yerinə düşər ki, 44 gün sürən hərbi əməliyyatlar nəticəsində müzəffər Azərbaycan ordusu Cəbrayıl, Füzuli, Zəngilan, Qubadlı şəhərlərini, Azərbaycan xalqının tarixində, mədəniyyətində və qəlbində xüsusi yeri olan, Qarabağın tacı sayılan Şuşa şəhərini, Zəngilan rayonunun Mincivan, Ağbənd, Bartaz qəsəbələrini, Xocavənd rayonunun Hadrut qəsəbəsini və bir çox kəndlərini, Tərtər rayonunun Suqovuşan kəndi, Xocalı və Laçın rayonlarının bir neçə kəndləri daxil olmaqla, ümumilikdə, 300-dən çox yaşayış məntəqəsini, həmçinin, Ağdərə, Murovdağ və Zəngilan istiqamətlərində mühüm strateji yüksəklikləri işğaldan azad edib. Rəşadətli Azərbaycan əsgər və zabitləri addım-addım irəliləyərək, Ermənistanın uzun illər ərzində qurduğu mühəndis-istehkam sistemlərini yarıb keçiblər, torpaqlarımız qəhrəman əsgər və zabitlərimizin, şəhidlərimizin qanı və canı bahasına azad olunub. Azərbaycanın hərbi sahədə qazandığı qələbələr, xüsusilə Şuşanın düşmən əsarətindən qurtarılması müharibənin taleyində həlledici rol oynayıb, Ermənistanın öz məğlubiyyətini etiraf etməsi və kapitulyasiyası ilə nəticələnib, Ermənistanı Kəlbəcər, Ağdam və Laçın rayonlarını Azərbaycana qaytarmağa məcbur edib. Dünən Müdafiə Nazirliyi Vətən Müharibəsində Silahlı Qüvvələrimizin 2783 nəfər hərbi qulluqçusunun həlak olduğunu açıqlayıb. 103 nəfər hərbi qulluqçunun DNT analiz metodu ilə şəxsiyyətinin müəyyən edilməsi üzrə işlər davam etdirilir. 100 nəfərdən artıq hərbi qulluqçumuz isə itkin düşmüş hesab olunur. Hazırda 1245 nəfər hərbi qulluqçumuzun tibb müəssisələrində müalicəsi davam edir. Allah şəhidlərimizə rəhmət eləsin! Yaralılarımıza şəfa versin! Zəfər onların əsəridir!

Sabah faşizm üzərində qələbənin 75-ci ildönümüdür.  Moderator.az olaraq Respublika Veteranlar Təşkilatının sədr müavini, polkovnik Cəlil Xəlilovla söhbətimizdə bu böyük tarixi günlə bağlı bir sıra məqamlara aydınlıq gətirməyə çalışdıq.  -Cəlil müəllim, sabah faşizm üzərində qələbənin 75-ci ildönümüdür. Öncə bu tarixi günlə bağlı düşüncələrinizi bilmək istərdik.  -Faşizm üzərində qələbənin əldə edilməsi ümumbəşəri bir hadisədir və qürurvericidir ki, bu qələbənin əldə edilməsində Azərbaycanın müstəsna xidmətləri var.  Bildiyiniz kimi, koronavirus pandemiyası səbəbi ilə ölkəmizdə bununla bağlı planlaşdırılan genişmiqyaslı tədbirlərin hamısı təxirə salınıb. Lakin dövlətimiz, ölkə başçımız indiki həssas məqamda da veteranları qayğı və diqqətdən kənarda qoymadı. Veteranlarımız evlərində ziyarət olundu, onlara müxtəlif yardımlar, hədiyyələr, mükafatlar verildi.  Istər ölkə başçısı, istərsə də I vitse-prezidentimiz tərəfindən veteranlarımıza göstərilən diqqət və qayğı müharibə veteranları tərəfindən böyük məmnunluqla qarşılanır. Biz Respublika Veteranlar Təşkilatı olaraq dövlət rəhbərliyinə veteranlara göstərdiyi qayğıya görə təşəkkür edir, öz minnətdarlığımızı bildiririk. Bir daha bəyan edirik ki, veteranlarımız ölkə başçısının yürütdüyü siyasəti qətiyyətlə müdafiə edir və bundan sonra da eyni qətiyyətlə müdafiə emtəkdə davam edəcək.  -Azərbaycan xalqının faşizm üzərindəki qələbədəki rolu zaman-zaman dünyanın bir çox ictimai-siyasi xadimləri, hərbi ekspertləri tərəfindən etiraf olunub. Bəs qələbənin 75-ci ildönümündə bununla bağlı yeni etiraf və xatırlanma oldumu?  -Azərbaycan xalqının qəhrəman oğul və qızlarının faşizmə qarşı mübarizədə göstərdiyi fədakarlıqlar qeyd etdiyiniz kimi, dünyanın bir çox görkəmli şəxsiyyətləri, hərbi-siyasi xadimləri tərəfindən etiraf olunub. Dünyanın bir çox ölkələrində, şəhərlərində qəhrəman Azərbaycan oğullarının büstləri, heykəlləri mövcuddur.  Qələbənin 75-ci ildönümündə veteranlarımızın qəhrəmanlığı yenə də bir sıra dünya dövlətlərinin diqqət mərkəzində idi. Təsadüfi deyil ki, bir sıra veteranlarımız Rusiya prezidenti tərəfindən müharibənin 75 illiyi ilə bağlı yubiley medalı ilə təltif edildi. Bu faktın özü xalqımızın faşizm üzərində qələbəyə verdiyi töhfənin növbəti etirafı hesab edilə bilər.  -Azərbaycanda veteranları təbrik edən daha hansı dövlət qurumları oldu?  -Deməliyəm ki, bütün dövlət qurumları bu məsələdə öz həssasiyyətini ortaya qoydu. Məsələn,  Müdafiə Nazirliyi, SHXÇDX, Heydər Əliyev Fondu veteranları müxtəlif hədiyyələrlə təbrik etdi. Ölkə başçısı veteranlarımızı yubiley medalı ilə mükafatlandırdı. Ailə, Qadın və Uşaq Problemləri üzrə Dövlət Komitəsi qadın veteranları müxtəlif hədiyyələrlə yad etdi. Bir sözlə, dövlət qurumlarımız qələbənin 75-ci ildönümündə veteranlarımızı tək qoymadı.  -Cəlil müəllim, qadın veteranlardan bəhs etdiniz. Müharibədə iştirak edən qadın döyüşçülərimizlə bağlı hər hansı statistika mövcuddurmu?  -Müharibədə 10 mindən çox Azərbaycan qadını cəbhələrdə faşizmə qarşı mübarizə aparıb. Onların bir çoxu müxtəlif igidliklərə görə təltif olunub. 35 min qadın neft sənayesində çalışıb, sovet ordusunun hərbi texnikasının yanacaq ehtiyatını təmin edib. 1500 nəfər qadın kolxoz-sovxoz rəhbərliyində təmsil olunub, kişilərin ön xətdə olduğu zamanda arxa cəbhədə böyük fədakarlıqlar göstərib. Təkcə bu statistikanın özü qadınlarımızın faşizmə qarşı necə böyük mətinliklə mübarizə apardığını təsdiq edir.  -Cəlil müəllim, faşizm üzərindəki qələbə Qarabağ müharibəsi, vətənpərvərlik təbliğatı baxımından nə dərəcədə önəmlidir?  -Xalqımızın faşizmə qarşı apardığı mübarizə, bu mübarizədə göstərilən qəhrəmanlıqlar vətənpərvərlik təbliğatının konkret faktlara, nümunələrə istinadən həyata keçirillməsi baxımından mühüm əhəmiyyətə malikdir. Ötən əsrin 40-cı illərində  faşizmə qarşı mübarizə aparan Azərbaycan xalqı bu gün erməni faşizmi ilə müharibə şəraitindədir. Torpaqlarımızın 20%-i işğal edilib. Belə olan təqdirdə atalarımızın, babalarımızın mübarizə və döyüş təcrübəsinin öyrənilməsi, onların qəhrəmanlıqlarının ilham mənbəyinə çevrilməsi gənclərimiz üçün mənəvi baxımdan böyük stimul təşkil edir.  Gənclərimiz babalarının göstərdiyi igidliklərdən, qəhrəmanlıqlardan xəbərdar olmalı, öz əməllərində, erməni faşizmə qarşı mübarizədə bu böyük qəhrəmanlıqları təkrarlamalıdırlar.  Sonda,  faşizm üzərində qələbənin 75-ci ildönüüm münasibəti ilə xalqımızı təbrik edir, bir daha veteranlara göstərdiyi diqqət və qayğıya görə ölkə başçısı və Mehriban xanıma öz təşəkkürümü bildirirəm.  Seymur ƏLİYEV