Bu, keçmiş məcburi köçkünlərimizin sabaha inamının, mübarizə əzminin, yaradıcılıq eşqinin nümunəsidir... Ali təhsil müəssisələrinə qəbul imtahanlarının nəticələrinə əsasən Xankəndi şəhəri, Xocalı və Ağdərə rayonundan ümumilikdə 20 abituriyent ali məktəbə qəbul olub. Bu barədə Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsi məlumat yayıb. Məlumatda qeyd olunur ki, ali məktəbə qəbul olunan abituriyentlərdən  9-u Xankəndi şəhərindən, 6-sı Xocalıdan, 5-i isə Ağdərə rayonundandır. Xankəndi şəhəri, Xocalı və Ağdərə rayonundan 20 abituriyentin ali məkəbə qəbul olunması sadəcə təhsil uğuru deyil. Bu, doğma yurd yerində yenidən məskunlaşan keçmiş məcburi köçkünlərimizin sabaha inamının, mübarizə əzminin, yaradıcılıq eşqinin nümunəsidir. Bu fakt sübut edir ki, Prezident İlham Əliyevin dəfələrlə qeyd etdiyi kimi, Azərbaycan xalqı işğal dönəmində ermənilər tərəfindən viran edilən torpaqlarımızı yenidən dirçəltməkdə, bu torpaqlara həyat gətirməkdə qərarlıdır və bunun üçün gərəkli olan istənilən fədakarlıqdan imtina etməyəcək.                           Xankəndi şəhəri, Xocalı və Ağdərə rayonundan ümumilikdə 20 abituriyentin ali məktəbə qəbulu həm də Azərbaycaycan Respublikasının Prezidenti, Müzəffər Ali Baş Komandan İlham Əliyevin şəhid qanı ilə sulanan bu torpaqlarda elm və təhsili inkişaf etdirmək əzminin, quruculuq səriştəsinin göstəricisidir. Bu, həm də dövlət başçısının tapşırıq və göstərişlərinin yerlərdə yüksək səviyyədə icra edildiyini sübut edir. Heç kimə sirr deyil ki, yüksək bilik yalnız mütaliə sevgisi tələb etmir. Yüksək bilik, həm də müasir təhsil müsəssisələri, gərəkli infrastruktur, sosial təminat tələb edir. Hansı ki, bütün bu faktorlar Prezident İlham Əliyevin bilavasitə diqqət və qayğısı altında Xankəndi, Ağdərə və Xocalıda Prezidentin xüsusi nümayəndəliyi tərəfindən yüksək səviyyədə təmin edilib və bu istiqamətdə lazımi işlər günümüzdə də mütəmadi şəkildə davam etdirilməkdədir. Yeni təhsil müsəssisələrinin inşası, müasir infrastrukturun genişləndirilməsi və beynəlxalq standartlar səviyyəsinə yüksəldilməsi, yeni iş yerlərinin açılması və s. bütün digər sahələr kimi təhsil sahəsindəki gələcək nailiyyətlər üçün ciddi zəmindir. Görülən və görülməkdə olan işlərin miqyas və mahiyyəti onu deməyə əsas verir ki, qarşıdakı illərdə işğaldan azad edilən torpaqlarımızda məskunlaşan abituriyentlər arasında ali məktəbə daxil olanların sayı daha da artacaq və doğma Qarabağımız yalnız Azərbaycanda deyil, bütün regionda elm və təhsil mərkəzi kimi böyük şöhrət qazanacaq. Seymur ƏLİYEV  

Veteran.gov.az xəbər verir ki, Müharibə, Əmək və Silahlı Qüvvələr Veteranları Təşkilatının Gənclərin vətənpərvərlik tərbiyəsi və ideoloji hazırlığı  şöbəsinin əməkdaşları - şöbə müdiri ehtiyatda olan  polkovnik Adil Haqverdiyev və baş mütəxəssis Nəbi Hacıyev 27 yanvar 2026-cı il tarixində Respublika Veteranlar Təşkilatında şəhid Murad Məmmədlinin mövlud gününə həsr edilmiş tədbirdə iştirak etdilər.  Tədbirdə   Dəmir Yolu və Metropoliten  üzrə Bakı Dövlət Peşə Təhsil Mərkəzinin tərbiyə işləri üzrə direktor müavini Fuad Əliyev, direktor müavini Nəzakət Allahverdiyeva tələbələr, müəllimlər, Nərimanov rayon Ağsaqqallar Şurasının sədri Arif Hümbətov, şəhidin  ailə üzvləri, döyüş yoldaşları, şəhid ailələri və digər qonaqlar iştirak etdilər. Tədbiri Dəmir Yolu və Metropoliten  üzrə Bakı Dövlət Peşə Təhsil Mərkəzinin tərbiyə işləri üzrə direktor müavini Fuad Əliyev açdı. Azərbaycan Dövlət Himni səsləndirildikdən sonra torpaqlarımızın qorunması yolunda canlarından keçmiş şəhidlərimiz bir dəqiqəlik sükutla anıldı. Çıxış üçün söz Dəmir Yolu və Metropoliten  üzrə Bakı Dövlət Peşə Təhsil Mərkəzinin  direktor müavini Nəzakət Allahverdiyevaya verildi. O,şəhid məzun Murad Məmmədlinin təhsil aldığı dövrdə yüksək nizam- intizamlı olmağndan,tapşırıqlara məsuliyyətlə yanaşmağndan,vətənə,millətinə bağlılığından danışdı. Tədbirdə çıxış edən  şəhidin bacısı Leyla İsmayılova qardaşı haqqında xoş xatirələrdən, onunla hər zaman qürur duymasımdan söz açaraq ,dövlətimizin şəhid ailələrinə göstərdiyi diqqət və qayğıdan danışdı. Digər çıxışçı Arif Hümbətov şəhidlərimizin dəyərindən, vətən qarşısında xidmətlərindən, onlarım daim xalqın qəlbində yaşayacağlarından bəhs edib. Daha sonra söz ehtiyatda olan polkovnik Adil Haqverdiyevə verildi. Adil Haqverdiyev ilk öncə Təşkilatın sədri polkovnik Cəlil Xəlilovun salamlarını tədbir iştirakçılarına çatdırıb, müstəqilliyə gedən ağır yoldan söz açıb:  “Biz xöbəxt xalqıq ki, müstəqil ölkəmiz var. Bu müstəqillik yolunda canından keçib şəhidlik zirvəsinə qalxan oğullarımızın adları daima uca tutulur. Onların adlarıının əbədiləşdirilməsini dövlətimiz daim diqqətdə saxlayır. Səhidlərin yaşadıqları küçələrə, məktəblərə onların adları verilir.Onların qəhrəmanlıqları haqqında kitablar yazılır və yazılacaq”. Tədbirin sonunda xatirə şəkilləri çəkildi.  

Birinci vitse-prezident Mehriban Əliyeva Ramazan bayramı münasibətilə Azərbaycan xalqını və dünya müsəlmanlarını təbrik edib. AZƏRTAC-ın məlumatına görə, Birinci vitse-prezident Mehriban Əliyevanın rəsmi "İnstagram" səhifəsində edilən paylaşımda deyilir: "Bütün Azərbaycan xalqını və dünya müsəlmanlarını müqəddəs Ramazan bayramı münasibətilə səmimi-qəlbdən təbrik edirəm! Uca Tanrı etdiyiniz duaları, tutduğunuz orucu qəbul etsin, bütün insanlara sağlamlıq və səadət, dünyamıza əmin-amanlıq və xoş günlər bəxş etsin!".

“Bilirsiniz ki, bir neçə keçmiş icra başçısı cinayət məsuliyyətinə cəlb edilmişdir, bəzilərinin hökmü verilmişdir, bəzilərinin işləri məhkəmədədir. Bu, onu göstərir ki, heç kim qanundan üstün ola bilməz. Mən bütün icra başçılarını vəzifəyə təyin edərkən göstərişlərimdən biri o idi ki, korrupsiyaya, rüşvətxorluğa qarşı biz amansız mübarizə aparmalıyıq və icra başçıları burada nümunə olmalıdırlar. Əfsuslar olsun ki, bəziləri əyri yolla gediblər və bu gün bunun acısını çəkirlər. Bu, hər bir dövlət məmuru üçün dərs olmalıdır”. Prezidenti İlham Əliyevin Araz Əhmədovu Masallı Rayon İcra Hakimiyyətinin, Əkbər Abbasovu Lerik Rayon İcra Hakimiyyətinin və Elvin Paşayevi Göygöl Rayon İcra Hakimiyyətinin başçısı vəzifələrinə təyin olunmaları ilə əlaqədar qəbul edərkən söylədiyi həmin fikirləri “Sağlamlığın Qorunması” İctimai Birliyinin sədri, tibb üzrə fəlsəfə doktoru Yazgül Abdıyeva bizimlə söhbətində diqqətə çatdırdı. Həmsöhbətim dövlət başçımızın “Siz daim insanlarla təmasda olmalısınız. Bütün kəndlərdə olmalısınız, kənd camaatının qayğıları ilə yaşamalısınız, onları narahat edən problemləri onların dilindən eşitməlisiniz və imkan daxilində bu problemləri həll etməlisiniz.” – fikirlərinə istinad edərək söylədi ki, yeni vəzifəyə təyin olu­nanlara bundan artıq hansı tövsiyələr, göstərişlər verilməlidir ki, onlar qanunu şah bilsinlər və ədaləti unutmasınlar? Prezident vurğuladı ki, gücünüz çatan problemləri rayon daxilində özünüz, bəzi məsələlər isə dövlət orqanları tərəfindən həll olunmalıdır. Əgər hər bir kəndin problemi həll olu­narsa, demək olar ki, ölkədə insanları narahat edən ciddi problem qalmayacaq. Bunun üçün aidiyyəti dövlət orqanlarına – Prezident Administrasiyasına, Nazirlər Kabinetinə müraciət etməlisiniz ki, mövcud problemlər öz həllini tapsın. Sosial ədalətin, bütövlükdə ədalət prinsiplərini cəmiyyətin əsas prinsiplərindən biri hesab edən dövlət başçımız dedi ki, sağlam cəmiyyətdə ədalət hökm sürür. Biz isə sağlam cəmiyyət qururuq və demək olar ki, bu işdə müvəffəqiyyətlər qazanmışıq. Bizim siyasətimiz nəticəsində Azərbaycan hərbi və ondan sonra siyasi yollarla Ermənistanın işğalçılıq siyasətinə son qoyub, əzəli torpaqlarımızı azad edib, tarixi ədaləti və milli qüruru bərpa edib. Yazgül Abdıyeva vurğuladı ki, Qələbə sevin­cini xalqımıza qazandıran şəhidlərimiz və onların ailələri, qazilərimiz unudulmamlıdır. Prezident nitqində məhz bu məsələyə daha ciddi diqqət göstərilməsini tövsiyə etdi: “Şəhid ailələrinə xüsusi diqqət göstərilməlidir. Dövlət tərəfindən bu diqqət daim göstərilir. İkinci Qarabağ müharibəsindən əvvəl və İkinci Qarabağ müharibəsindən sonra şəhid ailələri daim diqqət mərkəzindədir. Bilirsiniz ki, mənim şəhid ailələri, müharibə əlilləri ilə çoxsaylı görüşlərim olub. Onların məişət problemləri dövlət xətti ilə həll olunur, 12 min 500-dən çox şəhid ailəsinə dövlət tərəfindən mənzillər, fərdi evlər veril­mişdir, minlərlə minik maşınları verilmişdir”. Bu proses davam etdirilir. Bakı, Sumqayıt və Abşeron rayonlarında şəhid ailələrinin evlə təminatı məsələləri artıq yekunlaşmaq üzrədir. Digər rayon­larda da dövlət öz üzərinə düşən vəzifəni icra edir. O cümlədən, şəhid ailələrini, müharibə əlillərini işlə təmin etmək üçün çoxsaylı tədbirlər həyata keçirilir. Əsas odur ki, yerlərdə də bu kateqoriyadan olan insanlara diqqət göstərilsin. Rayon icra orqanlarının nümayəndələri onlara biganə qalmasınlar, əksinə, daim onların yaşayışı və məşğulluğu ilə maraqlan­sınlar. Yazgül Abdıyeva daha sonra dedi ki, dövlət başçımız “Biz bu Qələbəni onlara – şəhidlərimizə, müharibə əlillərinə, müharibə iştirakçılarına borcluyuq. Əlbəttə, dövlət qətiyyət göstərdi, biz öz iradəmizi ortaya qoyduq, heç nəyə baxma­dan, heç kimdən çəkinmədən, “öldü var, döndü yoxdur” deyərək torpaqlarımızı azad etdik.” – deyirsə, məmurlar daha diqqətli, daha ədalətli və mərhəmətli olmalı, onların qayğılarını daim diqqətdə saxlamalıdırlar. Biz də QHT olaraq daim qazilərin problemlərinə diqqətlə və həssaslıqla yanaşırıq. Çalışırıq ki, azad edilmiş torpaqlarımıza bayrağımızı sancan qəhrəman əsgər və zabitlərimizə ilk növbədə yardım edək. Çünki, dövlət başçımızın dediyi kimi, onlar öz canlarını fəda edib, sağlamlı­ğını itirib, heç nəyə baxmadan, qorxmadan ölümə gedərək Vətənimizi işğalçılardan xilas ediblər: “Ona görə hər bir dövlət məmurunun, nəinki dövlət məmurunun, hər bir insanın borcudur ki, onlara arxa, dayaq olsun. Yenə də deyirəm, dövlət və mən Prezident kimi daim onların problemləri ilə maraq­lanıram, bu problemləri həll edirəm, daim onlarla bir yerdəyəm. Hər bir dövlət məmuru da, bax, eyni hərəkətlər etməlidir”. Həqiqətən də ölkəmizdə şəhid ailələrinin, qazilərin istər mənzillə təminatı, istərsə, məşğulluqla bağlı problemləri yüksək səviyyədə həll edilir. “Qəhrəmanlarımızın məşğulluğuna dəstək olaq” – devizi ilə aparılan “Məşğulluq marafonu”na müraciətlər gündən-günə artır. İşəgötürənlər bu məqsədlə mövcud və ya yeni yaradılmış vakansi­yalar barədə məlumatları davamlı olaraq təqdim edirlər. İşsiz və iş axtaran kimi “Məşğulluq” altsistemində qeydiyyatda olan şəhid ailəsi üzvləri və Vətən müharibəsində yaralanmış qazilər vakansi­yalar üzrə işlə təmin olunurlar. Prezident rayonlara yeni təyin olunan icra hakimiyyəti başçılarına göstərişlərinin, tövsiyələrinin bundan ibarət olduğunu dedi və vurğuladı ki, mən sizdən fəal iş gözləyirəm, nəticə gözləyirəm. Əminəm ki, siz bu yüksək etimadı dərk edərək, dediyim kimi işləyəcəksiniz. Yazgül Abdıyeva da dövlət başçısının bu fikirlərinə istinad edərək, söhbətin sonunda dedi: “Biz də əminik ki, gənc kadrlar öz işlərində qanunun aliliyinə hörmətlə yanaşacaq, ədalət prinsipinə söykənib fəaliyyət göstərəcəklər”.  Söhbətləşdi: Zərifə BƏŞİRQIZI, “Xalq qəzeti”