Aqil Şirinov: “Vətən müharibəsindəki dəstəyinə görə qardaş Türkiyə və Pakistana da öz təşəkkürümüzü bildiririk”   Veteran.gov.az xəbər verir ki, Azərbaycan İlahiyyat İnstitutunun rektoru, dosent Aqil Şirinov 27 Sentyabr - Anım Günü münasibətilə paylaşım edib. Sözügedən paylaşımda deyilir:   “Bu gün xalqımız Anım Gününü qeyd edir. Qələbə zövqünü dadmağı bizə nəsib edən Uca Yaradana şükürlər olsun! İki əsr bundan öncədən başlayaraq başqa məmləkətlərdən gətirilən və Qarabağımızda, İrəvanımızda, Zəngəzurumuzda, Göyçəmizdə, Dərələyəzimizdə, Uluxanlımızda, Zəngibasarımızda, Vedimizdə, Qəmərlimizdə, Ağbabamızda, Qaraqoyunlu dərəsində, Dilicanımızda və digər torpaqlarımızda məqsədyönlü şəkildə yerləşdirilən mənfur tayfaya sarsıdıcı zərbə endirərək əyik başımızı göylərə qaldıran, ölümü öldürərək ölümsüzləşən əziz şəhidlərimizin ruhları qarşısında baş əyir, onları yetişdirən ata-analara sonsuz minnətdarlığımızı bildiririk. Sinəsini vətən yolunda sipər edən qazilərimizə minnətdarıq. Dünyanın böyük güc mərkəzlərinin təzyiqi qarşısında əzmkarlıq və qətiyyət göstərərək Azərbaycan xalqının haqqını qoruyan, millətimizin imzasını övraqi-həyata qoyan müzəffər Ali Baş Komandanımıza minnətdarıq. Azərbaycana hüdudsuz və əmmasız dəstəyini göstərən Türkiyəmizə minnətdarıq. Müsəlman qardaşlığını ritorika və ya siyasi ambisiya naminə deyil, həqiqi mənada və əməli müstəvidə izhar edən qardaş Pakistana minnətdarlığımızı bildirərək “Pakistan zində bad!” deyirik. Və əlbəttə ki, dinindən, etnik və ictimai mənsubiyyətindən asılı olmayaraq, bu çətin və taleyüklü günlərdə bir olmağı, yumruq olmağı bacaran Azərbaycan vətəndaşlarına minnətdarıq. Qoy bayrağımız əbədi olaraq azad yurdumuzun üstündə dalğalansın! Allah şəhidlərimizə rəhmət eləsin! Qarabağ Azərbaycandır!"  

Veteran.gov.az xəbər verir ki, Cəlilabad rayon Veteranlar Təşkilatı Dini Qurumlarla iş üzrə Dövlət Komitəsinin rayon şöbəsi və "Qarabağ qaziləri" İctimai Birliyi ilə birlikdə 28 May Müstəqillik günü münasibəti ilə tədbir keçirib. Tədbirdən öncə ölkəmizin müstəqilliyi yolunda və torpaqlarımızın azadlığı uğrunda qurban getmiş şəhidlərimizin əziz xatirəsi bir dəqiqəlik sükutla yad edilib. Tədbiri giriş sözü ilə rayon Veteranlar Təşkilatının sədri Ədalət Salman açaraq müstəqillik günü ilə əlaqədar ətraflı məlumat verib. Bildirib ki, 1918-ci il mayın 28-də Azərbaycan Xalq Cümhuriyyətinin Milli Şurası İstiqlal  Bəyannaməsi imzalamaqla Azərbaycanın müstəqilliyini bütün dünyaya bəyan etmiş, xalqımızın çoxəsrlik dövlətçilik ənənələrini davam etdirmişdir. O, vurğulayıb ki, cəmi 23 ay mövcud olmuş Azərbaycan Xalq Cümhuriyyəti müsəlman Şərqində demokratiya ənənələrinin formalaşmasına əhəmiyyətli təsir göstərmişdir. DQİDK-nin rayon şöbəsinin rəhbəri Cavidan Rəşidov, Ağsaqqallar Şurasının sədri Ədalət Əsgərov, Azərbaycan Yazıçılar Birliyinin üzvləri İman Abdulla, Əlövsət Tahirli, şəhər 4 saylı klubun müdiri Xeyrulla Şahbazov, Qırmızı Aypara Cəmiyyəti rayon bölməsinin nümayəndəsi Mirsüleyman Eynullayev, Əmək və Müharibə veteranları Adil Turabov, Mirzəbala Hüseynov, Yusif Əzimov, "Qarabağ qaziləri" İctimai birliyinin sədri Maşallah Əliyev və başqaları çıxış edərək Azərbaycan Xalq Cümhuriyyətinin varisi olan müasir Azərbaycanımızın daha da çiçəklənməsi naminə həmişə dövlətimizə dəstək olacaqlarını bildiriblər. Tədbirin sonunda Azərbaycan Respublikası Müharibə, Əmək və Silahlı Qüvvələr Veteranları" İctimai birliyinə yeni üzv qəbul edilmiş veteranlara vəsiqələr təqdim olunub.

Cəlil Xəlilov: ”Bu təlimlər göstərir ki, “Dəmir yumruq” yerindədir və bundan sonra da yerində olacaq”   Xəbər verdiyimiz kimi, Azərbaycan ordusu 10 min şəxsi heyət, tank və digər zirehli texnikaların iştirakı ilə təlimlərə start verib.   Veteran.gov.az-a açıqlamasında bu təlimlərin önəminə diqqət çəkən Respublika Veteranlar Təşkilatının sədr müavini, polkovnik Cəlil Xəlilov ordumuz tərəfindən keçirilən bu təlimlərin bir çox aspektdən mühüm əhəmiyyətə malik olduğunu vurğuladı:   “Şübhəsiz ki, bu və bu kimi hərbi təlimlər Azərbaycan ordusunun döyüş qabiliyyətinin yüksəldilməsi, onun peşəkarlığının artırılması baxımından mühüm əhəmiyyətə malikdir.  Təsadüfi deyil ki, 44 günlük Vətən Müharibəsinə qədərki dönəmdə də Azərbaycan ordusu çoxlu sayda irimiqyaslı təlimlər keçirirdi. Hansı ki, bu təlimlərdə məqsəd müxtəlif qoşun növlərinin fəaliyyətinin döyüş şəraitində  təşkili, şəxsi heyətin çətin və mürəkkəb relyef şəraitində hərəkətinin təmin edilməsi, şərti hədəflərin yüksək dəqiqlikllə məhv edilməsi, tank və artilleriya bölmələrinin hazırlıq səviyyəsinin yüksəldilməsi və s. kimi məqsədlərə xidmət edirdi. Sevindiricidir ki, biz bütün bunların bəhrəsini 44 günlük Vətən Müharibəsində əməli şəkildə gördük. Ordumuz Ali Baş Komandanımızın rəhbərliyi altında qısa zamanda işğaldakı torpaqları azad etdi, düşməni sözün həqiqi mənasında darmadağın etdi. Məşhur hərbi deyimlə desək, təlim nə qədər ağır olarsa, döyüş o qədər asan olar. Ordumuz Vətən müharibəsində bu deyimin doğruluğunu bir daha təsdiq etdi.   Bugünlərdə keçirilən təlimlər ordumuzun Vətən müharibəsindəki döyüş hazırlığının qorunub saxlanılmasına və möhkəmlənməsinə hesablanıb. Əvvəlki təlimlərdə olduğu kimi, bu təlimlərdə də piyadalarla yanaşı tankların, ağır artileriyanın birgə iştirakı ilə hücum əməliyyatının təşkili, müxtəlif qoşun növlərinin birgə fəaliyyətinin operativ və effektiv şəkildə təmini, hücum və anti-terror əməliyyatları zamanı müasir silahların tətbiqi və s. diqqət mərkəzində saxlanılan əsas məsələlərdən biridir. Ona görə də bu təlimləri və onun ordumuz üçün əhəmiyyətini yüksək qiymətləndirirəm. Hesab edirəm ki, düşmənlərimiz bu təlimlərdən lazımi nəticə çıxarmalı, ölkəmizə qarşı hansısa təxribata əl atacaqları təqdirdə Azərbaycan ordusu tərəfindən ağır şəkildə cəzalanacaqlarının mütləqliyini dərk etməlidirlər. Ölkə başçısının qeyd etdiyi kimi, “Dəmir yumruq” yerindədir və hər zaman da yerində olacaq”.   Seymur ƏLİYEV