Heydər Əliyev
Heydər Əliyev: Azərbaycan xalqının vətənpərvərlik simvolu!
Qarşıdan 10 may – Ulu Öndər Heydər Əliyevin anadan olmasının 103-cü ildönümü gəlir. Həyatının hər bir anını xalqına həsr edən, Azərbaycanın çiçəklənməsi, inkişafı və tərəqqisi üçün böyük fədakarlıqlar sərgiləyən Heydər Əliyevi ən müxtəlif prizmalardan xarakterizə etmək, onun tarixi xidmətlərinə fərqli rakurslardan yanaşmaq mümkündür. Lakin heç kimə sirr deyil ki, Heydər Əliyevi xarakterizə edən ən başlıca xüsusiyyət onun vətənpərvərliyi, doğma vətənə və xalqa sədaqəti olub.
Vətənpərvərlik mənəviyyat göstəricisi kimi...
Ümummilli Lider Heydər Əliyevə görə vətənpərvərlik sıradan bir hiss, adı bir duyğu deyildi. Ulu öndər vətənpərvərliyə insan mənəviyyatının ayrılmaz tərkib hissəsi kimi yanaşırdı. Heydər Əliyev hesab edirdi ki, hər bir insan vətənpərvər olmalı, öz vətəninin bugününü və sabahını düşünməli, öz dövlətinin inkişafı üçün əlindən gələni əsirgəməməlidir.
Ümummilli Liderə görə vətənpərvərlik həm də bir insanın mənəviyyat göstəricisi, şəxsiyyət barometri idi. Buna görə də Heydər Əliyev içində vətənpərvərlik hissi olmayan şəxsləri mənəviyyatsız adlandırır, onları dövlət və xalq üçün yararsız hesab edirdi:
“Vətənpərvərlik insanın daxilindəki duyğulardır, əgər bunlar yoxdursa o insan mənəviyyatsızdır”.
Heydər Əliyevə görə vətənpərvərlik sədaqət hissi ilə ayrılmaz şəkildə bağlıdır. Məhz buna görə də Ulu Öndər deyirdi:
“Vətəni sevmək onun hər qarış torpağına sahib çıxmaqdır”.
Sitatdan da göründüyü kimi, Heydər Əliyevə görə vətənpərvərlik öz mövcudluğunu əməli fəaliyyətdə göstərməli, praktiki müstəvidə təsdiqləməlidir. Yalnız belə olan təqdirdə gerçək vətənpərvərlikdən danışmaq, həqiqi vətən sevgisindən bəhs etmək olar.
Vətəni sevməyin Heydər Əliyev nümunəsi
Yuxarıda qeyd etdiyimiz kimi, Heydər Əliyev vətənpərvərliyi praktiki fəaliyyətin ayrılmaz bir hissəsi hesab edirdi. Ümummilli Liderin fikrincə, içində vətənpərvərlik hissi olan insan bunu hər bir addımında qeyri-ixtiyari hiss etdirir, vətənin inkişafı üçün öz gücü və səlahiyyəti daxilində bütün gərəkli addımları atır. Hansı ki, belə bir fəaliyyəti Heydər Əliyevin özünün həyat və fəaliyyətində aydın şəkildə izləmək mümkündür.
Özünün də qeyd etdiyi kimi, bütün ömrünü Azərbaycan xalqına, onun rifahı və tərəqqisinə həsr edən Heydər Əliyev hələ sovet dönəmində doğma vətənin inkişafı üçün ağır şərtlər altında ciddi addımlar atır, ölkəmizdə sənaye və kənd təsərrüfatının sürətli inkişafı üçün mühüm layihələr həyata keçirirdi. Təkcə bir faktı qeyd edək ki, 1975-ci ildə məhz Heydər Əliyevin iradəsi nəticəsində Bakıda kondinsioner zavodu inşa edilmiş, bu yenilik ölkəmizi sovet məkanında sənaye ölkəsi kimi mövqeyini əhəmiyyətli dərəcədə möhkəmləndirmişdi. Lakin bütün bu uğurlar asanlıqla başa gəlmir, uzunmüddətli mübarizə və fədakarlıq tələb edirdi. Ulu öndərin özü 25 dekabr 1995-ci ildə Bakı məişət kondisionerləri zavodunun 20 illik yubileyi münasibətilə təntənəli mitinqdəki çıxışında deyirdi:
“Bilirsiniz, mən sizə çatdırmalıyam ki, 60-ci illərin sonunda, 70-ci illərin əvvəlində mən Azərbaycanda müasir tipli maşınqayırma zavodlarının yaradılması haqqında məsələlər irəli sürərkən - bu məsələlər o vaxtlar Moskvada, Sovet İttifaqının rəhbərliyində həll olunurdu - Azərbaycana inam olmadığını müşahidə edirdim. Təkliflərimi qiymətləndirirdilər, mənə çox hörmətlə münasibət göstərirdilər. Ancaq mənə daim sübut etmək istəyirdilər ki, sizin respublikanın kadrları, mütəxəssisləri bu cür müəssisələrdən istifadə etməyə hazır deyillər, çünki keçən illərdə belə təşəbbüslər olub, ancaq belə zavodların tikilməsi, başa çatması çox gecikdirilib, yaxud da ki, çox səviyyəsiz olub. Ona görə də Sovetlər İttifaqının mərkəzi planlaşdırma orqanlarında, yüksək səviyyələrdə Azərbaycan haqqında, respublikamızın kadrları, elmi-texniki səviyyəsi barədə belə fikir var idi ki, biz geridə qalmış millətik, respublikayıq və belə müəssisələrin yaradılıb istifadə olunması səviyyəsinə gəlib çatmaq üçün bizə hələ çox vaxt lazımdır.
Mənim qarşımda çox ağır və çətin bir vəzifə dururdu. Mən bir tərəfdən sübut etməliydim ki, Azərbaycan xalqı yüksək səviyyəyə qalxmış bir xalqdır. Azərbaycanın kadrları, mütəxəssisləri, mühəndisləri müasir səviyyədədirlər və bizə inanmaq lazımdır. İkinci tərəfdən, mən bu bəyanatlarımı həyata keçirməli idim. Nəhayət, mənə və mənim sözlərimə olan inam Azərbaycanda bu tipli müəssisələrin yaranması üçün yol açdı. Biz bunu birinci növbədə Bakı kondisionerlər zavodunun tikilib başa çatdırılması ilə sübut etdik. Biz bu zavodu iki il müddətində yaratdıq və bütün dünyaya bəyan etdik. Mən 1975-ci ilin dekabrında Moskvaya, bütün dünyaya bəyan etdim ki, Azərbaycan xalqı nəyə qadirdir və necə böyük imkanları var”.
Azərbaycan gəncliyi üçün əbədi örnək: Böyük İnsan, Nəhəng Şəxsiyyət!
Heydər Əliyevin bir tək Bakı məişət kondinsionerləri zavodunun ərsəyə gəlməsi üçün atdığı addımlar, gördüyü işlər onun xalqımızın rifahı, respublikamızın gələcəyi üçün necə ağır mübarizələrdən keçdiyini göstərir. Və elə bir tək bu fakt Heydər Əliyevin Azərbaycan gəncliyinin gözündə Böyük İnsan, Nəhəng Şəxsiyyət kimi formalaşmasını təmin etməyə yetir. Bir tək bu fakt onu deməyə əsas verir ki, Heydər Əliyev üçün vətəni sevginin ən böyük təsdiqi əməli fəaliyyət idi. Buna görə də o, hər kəsdən məhz belə bir fəaliyyət - əməli addımlar, praktiki aktivlik gözləyirdi.
Bu gün Heydər Əliyev fiziki baxımdan aramızda olmasa da, onun böyük əməlləri, parlaq ideyaları, qoyub getdiyi zəngin dövlətçilik irsi yaşamaqda, yüz minlərlə gəncə yol göstərməkdədir. Müasir Azərbaycan gəncliyi üçün ən böyük vətənpərvərlik məktəbi Heydər Əliyev məktəbidir. Hansı ki, bu məktəb illər, əsrlər sonra da tarixlər yazan vətənpərvərlər yetişdirməkdə, dövlətimizin təhlükəsizliyi və tərəqqisinə sonsuz töhfələr verməkdə davam edəcək.
Rafiq Ağayev
Veteranlarla mədəni-kütləvi tədbirlərin təşkili şöbəsinin mütəxəssisi
