Respublika Veteranlar Təşkilatının nümayəndə heyəti 416-cı Azərbaycan atıcı diviziyasının Rusiya Federasiyasının Taqanroq şəhərinin alman-faşist işğalçılarından azad olunmasının 76-cı ildönümünə həsr olunmuş bayram tədbirində, eləcə də Taqanroq şəhərində “Hərbi Şöhrət Şəhəri”  abidəsinə və “Sambek yüksəkliyi” memorial abidə kompleksinə əklil qoyma rəsmi mərasimlərində iştirak etmişlər. Səfər proqramına uyğun olaraq Respublika Veteranlar Təşkilatının nümayəndə heyəti Taqanroq şəhərinin Administarsiyasında,  şəhər Veteranlar Şurasında və 26 nömrəli orta məktəbin nəzdində fəaliyyət göstərən 416-cı Azərbaycan atıcı diviziyasına həsr olunmuş muzeydə keçirilmiş rəsmi görüşlərə qatılmış, Hərb Tarixi muzeyində olmuşlar. Bundan əlavə, Taqanroq şəhərində yaşayan Azərbaycanlıların milli-mədəni avtonomiyası - “Dostluq-Дружба” cəmiyyətinin rəhbərliyi və üzvləri ilə görüş keçirmişlər. Taqanroq şəhəri Hərb Tarixi muzeyində olan  Respublika Veteranlar Təşkilatının nümayəndə heyətinə muzeyin yaranma tarixi haqqında, ekskursiya keçirərək nümayiş olunan eksponatlar barədə məlumat verilib. Sonda nümayədə heyəti muzeyin qonaqlar kitabına xatirə olaraq ürək sözlərini qeyd ediblər. Daha sonra Respublika Veteranlar Təşkilatının nümayəndə heyəti 26 nömrəli orta məktəbin nəzdində fəaliyyət göstərən 416-cı Azərbaycan atıcı diviziyasına həsr olunmuş muzeyi ziyarət edib. Muzeyin direktoru Kotelevskaya Qalina muzeyin yaranma tarixi, 416-cı diviziyanın keçdiyi şərəfli döyüş yolu haqqında, nümayiş olunan eksponatlar barədə qonaqlara ətraflı məlumat verib. Səfərdə olan nümayəndə heyəti eyni zamanda Taqanroq şəhəri müharibə, təqaüdçülər, əmək, silahlı qüvvələr və hüquq-mühafizə orqanları veteranları surasının sədri ilə görüşlər keçirilmişdir. Görüşdə Taqnroq şəhəri Administrasiyasının ictimai təşkilatlarla iş üzrə şöbəsinin rəisi Dolqorukova Svetlana, şəhərdə fəaliyyət göstərən ictimai birliklərin rəhbərləri və nümayəndələri iştirak etmişlər. Şuranın sədri Başarina Olqa tədbiri açaraq rəhbərlik etdiyi şuranın yaranma tarixi, fəaliyyəti və keçirilən tədbirlər haqqında danışıb.  Görüşün sonunda Respublika Veteranlar Təşkilatının sədr müavini polkovnik C.Xəlilovun və A.Qritçenkonun müəllifləri olduğu “Победа и память” kitabı Taqnroq şəhəri Administrasiyasına təqdim olundu.   Səfərdə olan Respublika Veteranlar Təşkilatının nümayəndə heyəti baş tutmuş görüşlərdə təmsil olunduqları Respublika Veteranları Təşkilatının yaranma tarixindən, rəhbərliyi haqqında, fəaliyyətinin əsas istiqamətləri və dövlət rəhbərliyi tərəfindən - Azərbaycan Respublikasının Prezidenti-Silahlı Qüvvələrin Ali Baş Komandanı cənab İlham Əliyevin və Birinci Vitse-Prezidenti Mehriban xanım Əliyevanın veteranlara daim göstərilən diqqət və qayğıdan, veteranların sosial problemlərinin həlli istiqamətində həyata keçirilən tədbirlər və son dövrdə Respublikamızın sürətli inkişafından, dünya miqyasında qazandığı uğurlar barədə məlumat vermişlər. Taqanroq şəhəri Administrasiyası rəhbərinin sosial məsələlər üzrə müavini Qolubeva İrina Respublika Veteranlar Təşkilatının nümayəndə heyətini qəbul etmişdir. Görüş zamanı 416-cı Azərbaycan atıcı diviziyasının şərəfli döyüş yolu haqqında fikir mübadiləsi aparılmış, ikitərəfli əlaqələrin daha da genişləndirilməsi müzakirə edilmiş, gələcəkdə belə görüşlərin keçirilməsinə dair razılıq əldə olunmuşdur. Görüş zamanı O.Qolubeva və Taqanroq şəhərində yaşayan Azərbaycanlıların milli-mədəni avtonomiyası - “Dostluq-Дружба” cəmiyyətinin sədri İbrahimov Tacəddin Cəlil oğlu  Respublika Veteranları Təşkilatının təsis etdiyi iki dəfə Sovet İttifaqı Qəhrəmanı olan “Həzi Aslanov” medalı ilə təltif olunmuşdur. Səfərin növbəti günü  Taqanroq şəhəri Administrasiyasının inzibati binasını qarşısındakı meydanda “Hərbi Şöhrət Şəhəri”  abidəsi önündə əklil qoyma mərasimi keçirilmişdir. Mərasimi giriş sözü ilə şəhər Dumasının sədri Titarenko İnna açmış, O, çıxışında şəhərin alman-faşist işğalçılarından azad olunmasında bilavasitə iştirak edən 416-cı atıcı diviziyasının şəxsi heyətinin göstərdiyi fədakarlığı, qəhrəmanlıq və şücaətini xüsusi qeyd etmişdir. Sonra  abidə önünə əklillər və gül-çiçək dəstələri qoyulmuşdur. Səfər proqramına əsasən avqust ayının 30-nda Respublika Veteranlar Təşkilatının nümayəndə heyəti “Sambek yüksəkliyi” memorial abidə kompleksinə yola düşmüşdür. Baş tutmuş tədbirdə  Respublika Veteranlar Təşkilatının nümayəndə heyəti tədbirin rəyasət heyəti tərkibinə daxil edilərək tribunaya dəvət olunmuşdur. Mərasimi giriş sözü ilə Rostov vilayətinin qubernatoru Qolubev Vasiliy açmış və  O, çıxışı zamanı Rostov və Taqanroq şəhərlərinin alman-faşist işğalçılarından azad olunması tarixindən, veteranlara göstərilən qayğıdan və vilayətin bugünkü inkişafından danışmışdır. Rəsmi əklil qoyma mərasimi keçirilmiş və Respublika Veteranlar Təşkilatının nümayəndə heyəti döyüşlərdə həlak olmuş, lakin qalıqları indi tapılmış 45 adsız hərbi qulluqçuların qardaşlıq məzarında dəfn olunması prosesində iştirak etmişdir. Bununla səfər proqramının rəsmi tədbirləri başa çatmışdır.

Bu gün 20 yanvar faciəsinin 36-cı ildönümü ilə əlaqədar olaraq Müharibə, Əmək və Silahlı Qüvvələr Veteranları Təşkilatının üzvləri Şəhidlər Xiyabanını, “Əbədi məşəl”  və  “20 Yanvar” abidələrini ziyarət edib, şəhid məzarları və kompleks önünə gül dəstələri qoyublar. Veteranlar və məktəblilər qarşısında çıxış edən Müharibə, Əmək və Silahlı Qüvvələr Veteranları Təşkilatının sədri polkovnik Cəlil Xəlilov, 36 il bundan öncə sovet ordusunun xüsusi təyinatlı dəstələri tərəfindən xalqımıza qarşı törədilən cinayətin əsla unudulmayacağını, həmin faciə zamanı yalın əllə tankların üzərinə yeriyən soydaşlarımızın qəhrəmanlığının daim ehtiramla yad ediləcəyini bildirib. Polkovnik qeyd edib ki, məhz 20 yanvar hadisələri Azərbaycan xalqının milli azadlıq hərəkatının alovlanmasında, eləcə də sovet imperiyasının beynəlxalq miqyasda ifşasında mühüm rol oynadı Ziyarət əsnasında respublikamızın ərazi bütövlüyü, müstəqilliyi və suverenliyi uğrunda həlak olan şəhidlərin ruhuna dualar oxunub, onların xatirəsi yad edilib.

Qarabağın tacı sayılan, təməli 1752-ci ildə Qarabağ xanı Pənahəli xan tərəfindən qoyulan Şuşa şəhəri Azərbaycan tarixi və mədəniyyətində özünəməxsus əhəmiyyətli yer tutur. Dini-mədəni və tarixi abidələri, sarayları ilə məşhur olan Şuşa ədəbiyyat, incəsənət, siyasət və digər sahələrdə bir çox dahi və nüfuzlu şəxsiyyətlər yetişdirmişdir. Bu qədim diyar Azərbaycanın milli-mənəvi və mədəni irsinin təşəkkül və inkişafına mühüm töhfələr vermişdir. Bu mənada, “Şuşa şəhərinin Azərbaycanın mədəniyyət paytaxtı elan edilməsi haqqında” Azərbaycan Respublikası Prezidenti cənab İlham Əliyevin 7 may 2021-ci il və “Azərbaycan Respublikasında 2022-ci ilin “Şuşa İli” elan edilməsi haqqında” 5 yanvar 2022-ci il tarixli sərəncamları xüsusi əhəmiyyət kəsb edir. Azərbaycan İlahiyyat İnstitutu ölkə başçısının müvafiq sərəncamlarına uyğun olaraq, 05 may 2022-ci il tarixdə Şuşa şəhərinin 270 illiyinə həsr olunmuş “Milli-mənəvi və mədəni irsimizin təşəkkülündə Şuşa” mövzusunda respublika elmi konfransı təşkil edəcək. Konfransın məqsədi şəhərin milli-mənəvi və sosial-mədəni irsinin tarix, siyasət, ədəbiyyat, incəsənət, memarlıq, din və fəlsəfə kimi müxtəlif aspektlərdən araşdırılmasıdır. Bu istiqamətdə əsas vəzifə elmi tezis və məqalələrin nəşr olunaraq elmi-ictimai mühitə çatdırılmasıdır. Həmçinin aparılacaq elmi tədqiqat və müzakirələrə şərait yaratmaq, bu layihə çərçivəsində Azərbaycan İlahiyyat İnstitutu ilə Respublikanın digər elmi tədqiqat institut və mərkəzləri arasında əməkdaşlığı genişləndirməkdir. Konfransın əsas mövzu və istiqamətləri:– Azərbaycanın mədəniyyət paytaxtı olaraq Şuşa və onun tarixi;– Azərbaycanın ictimai-siyasi düşüncə tarixində Şuşa və şuşalı dövlət xadimləri;– Şuşanın Azərbaycan ədəbi irsində yeri;– Şuşada incəsənət və memarlıq nümunələri;– Şuşanın milli-mənəvi irsimizin təşəkkül və inkişafında rolu;– Şuşada dini-mədəni abidələr;– Şuşa – Azərbaycanın multikultural mədəni irsində;– Şuşanın geosiyasi əhəmiyyəti və 44 günlük Vətən müharibəsində Qarabağ Zəfəri. Məqalələrin qəbul qaydaları: 1. Məqalələr heç bir yerə təqdim edilməmiş yeni tədqiqatlar olmalıdır.2. Məqalələrin həcmi 6-15 səhifə, xülasələrin həcmi 200-250 sözdən ibarət olmalıdır.3. Məqalələrin mətni “A4” formatda, “12” ölçülü hərflərlə, yuxarıdan və aşağıdan 2 sm, soldan 3 sm, sağdan 1 sm məsafə ilə, 1 intervalla, Azərbaycan, türk və ya rus dillərində “Times New Roman” şriftində aşağıdakı elektron ünvana göndərilməlidir: ilahiyyatkonfransshusha@gmail.com4. Təqdim olunan yazının əvvəlində məqalənin başlığından sonra müəllifin adı, soyadı, işlədiyi müəssisə, tutduğu vəzifə, elmi dərəcəsi (olduğu təqdirdə) və müəllifin elektron poçt ünvanı göstərilməlidir.5. Məqalənin əvvəlində müəlliflə bağlı məlumatdan sonra, məqalənin yazıldığı dildə xülasə və açar sözlər verilməlidir.6. Elmi araşdırmaların yazılma üsullarına uyğun olaraq, beynəlxalq standartlara cavab verən məqalələrdə giriş, ən azı, iki yarımbaşlıq və nəticə olmalıdır.7. Mövzu ilə bağlı elmi mənbələrə istinadlar vacibdir. Məqalədə istinadlar göstərildiyi yerdən sonra, mötərizədə müəllifin soyadı, nəşrin ili və səhifə nömrəsi sıra ilə verilməlidir; məs.: (Məmmədov 2007, 17-21).Əgər bir müəllifin eyni ildə çap olunmuş iki və daha artıq əsəri varsa, belə olduğu halda, (Məmmədov 2007(1), 31-36) və ya (Məmmədov 2007 (2), 42-55) kimi qeyd edilməlidir. Məqalənin sonunda ədəbiyyat siyahısında soyad, ad və nəşr ili göstərildikdən sonra, mötərizə içərisində 1 və ya 2 rəqəmləri qeyd edilir; məs.: (Məmmədov Emil (2007/1), 31-36) və ya (Məmmədov Emil (2007/2), 42-55).8. Ədəbiyyat siyahısında verilən hər bir istinad haqqında məlumat bu formatda yerləşdirilməlidir: müəllifin soyadı və adı; nəşr ili (il); kitab; məqalə; konfrans və digərlərinin tam adı (əgər varsa, tərcümə edənin adı və soyadı); nəşr edilən yer; nəşriyyatın adı. Məqalələrdə ən sonda səhifələr göstərilir. Ədəbiyyat siyahısı məqalənin sonunda verilməlidir.9. Xülasə və açar sözlər məqalənin yazıldığı dildən başqa iki xarici dildə, ədəbiyyat siyahısından sonra yerləşdirilməlidir. Hər bir xülasədə məqalənin adı, müəllifin adı, soyadı və elmi dərəcəsi (olduğu təqdirdə) tam göstərilməlidir. Məqalənin müxtəlif dillərdəki xülasələri bir-birinin eyni olmalı və məqalənin məzmununa uyğun gəlməlidir.10. Müəllif məqalənin keyfiyyətinə, göstərilən faktların dəqiqliyinə və digər məlumatlara görə cavabdehlik daşıyır.   Məqalələrin təqdim olunması üçün son tarix: 17.03.2022Qəbul edilən məqalələrin elan edilmə tarixi: 11.04.2022Əlaqələndirici şəxslər: Elnarə Ağaoğlu (+99412) 510 65 45(+99470) 250 05 27Şahin Ələsgərov (+99412) 510 65 45(+99455) 529 93 80Emil İsbatov (+99412) 510 65 45(+99455) 200 21 03  

X Qlobal Bakı Forumu Azərbaycanın sülhpərvər və humanist mövqeyinin təntənəsidir. Azərbaycan dünyada qlobal məsələlərin həlli üçün təşəbbüslər göstərir. Bunu AZƏRTAC-a açıqlamasında Müharibə, Əmək və Silahlı Qüvvələr Veteranları Təşkilatının sədr müavini, polkovnik Cəlil Xəlilov deyib. Polkovnik qeyd edib ki, Forumda Azərbaycan Prezidentinin səsləndirdiyi fikirlər, müddəa və çağırışlar müasir dünyamızın reallığı ilə yanaşı, ölkəmizin ədalətli mövqeyinin beynəlxalq ictimaiyyətin diqqətinə çatdırmaq baxımından da böyük önəm kəsb edir: “X Qlobal Bakı Forumunda çıxış edən Prezident İlham Əliyev hər zaman olduğu kimi, bu dəfə də dəmir məntiqi və təkzibedilməz faktlarla dövrümüzün reallıqlarını təhlil etdi, Azərbaycan xalqının humanist, mütərəqqi mövqeyini dünya birliyinin diqqətinə çatdırdı. Ölkəmizdə müxtəlif xalqların, etnik birliklərin rifah içərisində yaşadığına, dinclik və əmin-amanlıq şəraitində fəaliyyət göstərdiyinə diqqət çəkən dövlətimizin başçısı, Qarabağ bölgəsində yaşayan ermənilərlə bağlı da ciddi bəyanatlar səsləndirdi. Prezidentimiz bildirib ki, işğal dövründən fərqli olaraq, həmin bölgədə yaşayan bütün vətəndaşlar kimi ermənilər də sosial firavanlıq içərisində yaşayacaq, ölkəmizin iqtisadi gücündən, dövlətimizin sosialyönümlü siyasətindən faydalanacaqlar. “Dünya bu gün: Çağırışlar və ümidlər” mövzusundakı Forumda dövlətimizin başçısı Ermənistanın Azərbaycanın sülh səylərini dəstəkləməsinin zəruriliyini də vurğulayıb. Prezident deyib ki, bu, regionda uzunmüddətli sülh və sabitliyin təmin olunması baxımından olduqca önəmlidir. Təşkilatın sədr müavini bildirib ki, ümumiyyətlə, X Qlobal Bakı Forumu Azərbaycanın yalnız Cənubi Qafqaz regionunda deyil, bütövlükdə dünyamızda baş verən proseslərə nə qədər ədalətli, obyektiv və humanist prinsiplərdən yanaşdığını əks etdirdi. Habelə, Prezident İlham Əliyevin Forumdakı çıxışı göstərdi ki, Azərbaycan mövcud problemləri qeyd etməklə yanaşı, həm də onların aradan qaldırılması ilə bağlı konkret təkliflərə, çıxış yollarına malikdir. X Qlobal Bakı Forumunun ölkəmizdə təşkili, Azərbaycan Prezidentinin çıxışına olan yüksək maraq ölkəmizin, dövlət başçımızın beynəlxalq aləmdə artan nüfuzunu bir daha ortaya qoydu. Forum göstərdi ki, Azərbaycan dünyadakı nüfuzunu artırmaqda, ölkəmiz qlobal miqyasda əsas söz sahiblərindən birinə çevrilməkdədir.