11 dekabr 2018-ci ildə Respublika Veteranları Təşkilatının inzibati binasında Respublika Veteranları Təşkilatının VIII Plenumu  keçirilmişdir. Tədbir iştitakçıları Fəxri Xiyabanı və Şəhidlər Xiyabanını ziyarət etmişlər. Tədbir Azərbaycan Respublikası Dövlət himninin səslənməsi ilə başlanmışdır. VIII Plenumu giriş sözü ilə Azərbaycan Respublikası Müharibə, Əmək və Silahlı Qüvvələr Veteranları Təşkilatının sədri, general-polkovnik Tofiq Ağahüseynov açmışdır. Plenumda RVT Rəyasət Heyətinin üzvləri, Mərkəzi Aparatın işçiləri, şəhər və rayon veteran təşkilatlarının sədrləri, İkinci dünya, Əfqanıstan, Qarabağ müharibələri və Silahlı Qüvvələr veteranları Plenumda iştirak etmişdir. Çıxışlardan əvvəl Azərbaycanın müstəqilliyi, ərazi bütövlüyü uğrunda canlarından keçmiş bütün şəhidlərimizin, eləcə də Təşkilatın ötən plenumdan sonra dünyasını dəyişmiş Rəyasət Heyəti üzvlərinin xatirəsi 1 dəqiqəlik sükutla yad edilmişdir. Respublika Veteranları Təşkilatının sədr müavini, ehtiyatda olan polkovnik Cəlil Xəlilov Təşkilatın 2018-ci il ərzindəki fəaliyyəti ilə bağlı məruzə ilə çıxış etmişdir. O demişdir: “Bu il bütün Azərbaycan, eləcə də Respublika Veteranlar Təşkilatı üçün sözün tam mənasında uğurlu il olmuşdur. Biz cari ildə çoxsaylı və mühüm tədbirlər keçirmiş, veteran hərəkatının yüksəlişi, gənclərin vətənpərvərlik tərbiyəsi, veteranların sosial müdafiəsinin gücləndirilməsi, onların ölkənin ictimai-siyasi həyatında daha fəal iştirakı istiqamətində uğurlu fəaliyyət göstərmişik. Əlbəttə, bütün bunlar da, ümumən Azərbaycanda veteranlarla bağlı dövlət tərəfindən həyata keçirilən ardıcıl və məqsədyönlü siyasətin mühüm rolu vardır. Hər il İkinci Dünya müharibəsi iştirakçılarına, bu müharibədə həlak olmuş və ya sonralar vəfat etmiş döyüşçülərin dul arvadlarına, həmin dövrdə arxa cəbhədə fədakar əməyinə görə orden və medallarla təltif edilmiş şəxslərə verilən birdəfəlik maddi yardımın həcminin artırılması, eləcə də veteranların sosial müdafiəsinin gücləndirilməsi sahəsində imzalanan fərman və sərəncamlar bu qayğının bariz təzahürləridir. Respublika Veteranlar Təşkilatı göstərilən qayğını yüksək qiymətləndirir və ona layiqincə cavab vermək üçün fəaliyyətinin səmərəliliyini ildən-ilə artırır. 2018-ci ildə Təşkilat tərəfindən Azərbaycan Xalq Cümhuriyyətinin, Silahlı Qüvvələrin yaradılmasının, Bakının daşnak-bolşevik qaragüruhundan azad olunmasının, Sovet İttifaqı Qəhrəmanı Mehdi Hənifə oğlu Hüseynzadənin anadan olmasının 100 illik, Ümummilli Lider Heydər Əliyevin 95 illik yubileylərinin keçirilməsi planlaşdırılmışdı. Bu yubileylərin hamısı həqiqətən də, yüksək səviyyədə keçirilmiş, ictimaiyyətdə böyük rezonans doğurmuşdur. Bu tədbirlərin nəinki ölkə, beynəlxalq səviyyədə keçirilməsi üçün də işlər görülmüşdür. RVT Rəyasət Heyətinin üzvləri Türkiyənin Əksişəhər şəhərində Azərbaycan Xalq Cümhuriyyətinin 100 illik yubileyinə həsr olunmuş beynəlxalq elmi konfransda iştirak etmişlər. Veteranlarımız 2018-ci il aprel ayında ölkədə keçirilən Prezident seçkilərində fəal iştirak etmiş və özlərinin layiqli namizdləri hesab etdikləri cənab İlham Əliyevi bir nəfər kimi dəstəkləmişlər. İkinci Dünya müharibəsində alman faşizmi üzərində qələbənin 73 illiyi ilə əlaqədar həm Mərkəzi Aparatda, həm də yerlərdə tədbirlər keçirilmiş, veteranlarla dövlət orqanlarında, ictimai təşkilatlarda, xüsusilə ali və orta təhsil ocaqlarında silsilə görüşlər baş tutmuşdur.  Mayın 9-da faşizm üzərində Qələbənin bayram edilməsi günündə Azərbaycan Respublikasının Prezidenti cənab İlham Əliyev veteranlarla görüşmüş, veteranlara dövlət başçısının adından böyük ziyafət verilmiş, onların qaldırdıqları məsələlər həllini tapmışdır. 9 mayda Respublika Veteranları Təşkilatında Müdafiə Nazirliyinin köməyi ilə 80 nəfər veterana xidmət üçün səyyar mətbəx qurulmuş və veteranlar Hərbi orkestrin ifa etdiyi müharibə vətən, qələbə, sevgi haqqında mahnıların sədaları altında bayram tədbiri keçirmişlər. Qələbənin 73-cü ildönümündə “Azərbaycan Veteranı” qəzetinin xüsusi nömrəsi buraxılmışdır. Yeri gəlmişkən, “Azərbaycan Veteranı” qəzeti Azərbaycan Xalq Cümhuriyyətinin və Silahlı Qüvvələrin 100 illik yubileylərinə də xüsusi buraxılış həsr etmişdir. Hərbi vətənpərvərlik tərbiyəsinin gücləndirilməsi, yeni nəslin Azərbaycan dövlətinə və xalqına sədaqət ruhunda hazırlanmaları məqsədi ilə keçirilən tədbirlər ölkənin bütün rayon və şəhərlərini əhatə etmişdir. Bu tədbirlərdə Təşkilatın rəhbərliyi və əməkdaşları, rayon veteran təşkilatlarının sədrləri, tədbirin təşkil olunduğu ərazidə yaşayan fəal veteranlar, yerli icra orqanlarının və ictimaiyyətin nümayəndələri iştirak etmişlər. Ümumiyyətlə, tədbirlərimiz həm coğrafi, həm də mövzu və auditoriya baxımından kifayət qədər geniş və zəngin olmuşdur. 16 oktyabr 2018-ci ildə Azərbaycan Respublikası Veteranlar Təşkilatının təşkilatçılığı ilə DTX-nın Şəhriyar adına Mədəniyyət Mərkəzində Azərbaycan Respublikası Müharibə, Əmək və Silahlı Qüvvələr Veteranları Təşkilatının 30 illik yubileyi keçirilmişdir. 17 oktyabr 2018-ci ildə isə 30 illik yubileyi çərçivəsində  Bakı şəhərində, “Park-İnn” hotelində dünyanın 17 ölkəsindən yüksək səviyyəli qonaqların, o cümlədən Dünya Veteranları Federasiyasının prezidenti, cənab Dan-Viggo Bergtunun, Azərbaycan Respublikasının dövlət orqanları, Parlament üzvləri, akademik və hərbi dairələri, ictimai təşkilatlarının, veteranların iştirakı ilə “Müasir dünyada təhlükəsizlik: qlobal və regional çağrışlar” mövzusunda beynəlxalq konfrans keçirilmişdir. Beynəlxalq konfransın iştirakçılarının Azərbaycan Respublikası Əmək və Əhalinin Sosial Müdafiəsi Nazirliyində nazir Sahil Babyevlə və Müdafiə Nazirliyində rəsmi görüşləri baş tutmuşdur. İl ərzində RVT-yə veteran və veteran ailələri nümayəndələrindən rəsmi surətdə 200-dən çox məktub, ərizə və müraciətlər daxil olmuşdur. Həmin məktub, ərizə və müraciətlər əsasında veteranların sosial-hüquqi müdafiəsinin təmin olunması, problemlərinin həlli məqsədi ilə 120 veteran barəsində müxtəlif dövlət orqanlarına rəsmi məktublar, sorğular göndərilmişdir. Həmin məktubların məzmununa gəlincə, bu mənzillə, işlə təminat, mənzil təmiri, xüsusi avtomaşın alınmasından başlamış, şəhid statusunun  bərpası, pensiyaların yenidən hesablanması, müharibə veteranı vəsiqəsinin verilməsi, mükafatlandırılma, borcun siliməsi, məhkəmə qərarlarının icrasına qədər ən müxtəlif sahələri əhatə etmişdir. Eləcə də, il ərzində telefon vasitəsi ilə 120-yə yaxın müxtəlif zümrədən olan veteranın müraciət və xahişi araşdırılmış, zəruri hallarda onlar Təşkilatda qəbul edilmişlər. 100 nəfərdən artıq veterana hüquqi yardım göstərilmişdir. Həmçinin, maddi yardım edilməsi barədə müxtəlif dövlət orqanlarına müraciət etmiş 60 veteran barəsində həmin orqanlara məlumat verilmiş, itkin düşmüş müharibə iştirakçılarının axtarışı ilə məşğül olunmuşdur. Əlillik dərəcəsi olan müharibə veteranlarıları fərdi minik avtomaşını ilə təmin edilib. Veteranlar ildə bir dəfə hərtərəfli tibbi müayinədən keçirilir. Bu il müxtəlif kateqoriyadan olan 3400 nəfər veteran Mərdəkanda fəaliyyət göstərən Veteranlar Xəstəxanasında müalicə almışdır. Son üç ildə və cari il ərzində respublika Protez Ortopedik Bərpa Mərkəzi tərəfindən 1460 nəfər müharibə əlilinə protez ortopedik məlumat və realibitasiya vasitələri, o cümlədən 144 ədəd əlil arabası verilib. Ancaq təəssüf ki, veteranların sanatoriya-kurort-putyovkası ilə təmin edilməsi sahəsində vəziyyət ürəkaçan deyil. 2018-ci il ərzində 15 nəfər veteran sanatoriya-kurort-putyovkası ilə təmin edilibdir. İş qabiliyyəti olan, işləmək istəyən veteranların iş yerləri ilə təmin edilməsi, qanunla veteran statusu almalı olan vətəndaşların müraciətrlərinin müsbət həll edilməsi üçün müvafiq orqanlar qarşısında vəsadətlərin qaldırılması istiqamətində də iş aparılmışdır. Ümumiyyətlə, ardıcıl sosial siyasət və veteranların həyat tərzini yaxşılaşdıran ehtibarlı sosial müdafiə tədbirləri təkcə Bakı şəhərini deyil, respublikanın bütün yaşayış məntəqələrini əhatə edir. Respublika Veteranları Təşkilatı işin təkmilləşdirilməsi, yeni keyfiyyət səviyyəsinə qaldırılması mümkün olmuşdur. Şirvan şəhərində, Goranboy, Ağstafa Saatlı, İmişli, Beyləqan, Füzuli rayonlarının veteran təşkilatlarında 2018-ci il üzrə illik planın icra vəziyyəti öyrənilmiş və həmin təşkilatlara metodiki  köməklik göstərilmişdir. Şəki və Lənkəran şəhərlərində RVT sədri tərəfindən həmin zonalar üzrə veteran təşkilatları sədrlərinin iştirakı ilə müşavirə keçirilmiş, yerli təşkilatlara fəaliyyətin daha da genişləndirilməsi ilə bağlı tövsiyələr verilmişdir. RVT nümayəndələri veteranların vəziyyəti ilə tanış olmaq və onlara münasib köməklik göstərmək üçün bu il ölkənin 20-dən çox rayonuna ezam olunmuşlar. Həmçinin, Respublika Veteranlar Təşkilatının rəhbər işçiləri avqust-dekabr aylarında cəbhə bölgəsinə səfər edərək Tərtər, Ağdam, Horadiz, Şəmkir istiqamətlərində N saylı hərbi hissələrin şəxsi heyəti ilə görüşlər keçirmişlər. Eləcə də, 2018-ci ildə Respublika Hərbi Prokurorluğu ilə birgə Azərbaycan Respublikası Silahlı Qüvvələrinin şəxsi heyəti arasında hüquq qaydalarının qorunması, hərbi nizam-intizamın möhkəmləndirilməsi və hərbi vətənpərvərlik tərbiyəsinin gücləndirilməsi istiqamətində müvafiq Tədbirlər Planına uyğun olaraq nümayəndələrmiz əsasən cəbhə zonalarında yerləşən hərbi hissələrdə şəxsi heyət qarşısında müxtəlif mövzularda çıxışlar etmişlər. Belə görüşlərin xüsusilə gənc zabit və əsgərlərimiz üçün böyük təcrübi və mənəvi əhəmiyyəti var. Təhsil Nazirliyinin Bakı şəhər idarəsi ilə imzalanmış Tədbirlər Planınmız da uğurla icra edilmişdir. Təşkilatın beynəlxalq əlaqələrinin daha da genişləndirilməsi məqsədilə xüsusilə MDB dövlətlərinin veteran təşkilatları ilə iş gücləndirilmişdir. MDB dövlələri ilə əməkdaşlıq çərçivəsində bir sıra ölkələrdə, eləcə də Birləşmiş Millətlər Təşkilatının dəstəyi ilə 31 may 2018-ci il tarixdə Cenevrə şəhərində Beynəlxalq Sülh Əsgərləri Assosiyasının təşkil etdiyi "Beynəlxalq Sülh Əsgərləri günü" tədbirində iştirak edilmişdir. Həmin tədbirlərdə diqqət Azərbaycanın sülh siyasətinə baxmayaraq, 20 faiz torpaqlarımızın bu gün də Ermənistanın işğalı altında olmasına, Ermənistanın təcavüzkarlıq siyasətini bu gün də açıq və arxayın şəkildə davam etdirməsinə, İkinci dünya müharibəsinin tarixini məqsədli şəkildə saxtalaşdırmasına və s. yönəldilmişdir. Hesabat dövründə Təşkilatın orqanı olan “Azərbaycan Veteranı” qəzetinin 23 sayı dərc olunmuş, Təşkilatın “veteran.gov.az” saytının imkanlarından təbliğati işin qurulmasında daha səmərəli istifadə edilmişdir. Tədbirlərimiz və ölkə ictimaiyyətinin Vətən müdafiəçilərinə olan münasibəti haqqında ölkə KİV-lərində, dövlət və müstəqil informasiya agentliklərində geniş məlumatlar verilmiş, “Azərbaycan”, “Respublika”, “Xalq qəzeti”, “525-ci qəzet” və s. qəzetlərdə, AzərTAC, “İnterfaks”, “The first New” məlumat agentliklərində, Azərbaycan TV, İctimai TV, Lider TV, “XəzərTV”, ATV-də, “Mir” tv-də təbliğat işi aparılmışdır. Eləcə də, əməkdaşlarımız “Azərbaycan”, “Respublika”, “525-ci qəzet”, “Novoe vremya”, “Bakinskiy raboçi” və s. qəzetlərdə məqalələrlə çıxış etmiş, müxtəlif televiziyaların hazırladığı verilişlərdə iştirak etmişlər. Sonra Respublika Veteranlar Təşkilatının illik fəaliyyəti ilə bağlı məsələlərlə əlaqədar, məruzə ətrafında çıxışlara başlanılmışdır. Prezident Aparatının İctimai-siyasi məsələlər üzrə şöbəsinin müdir müavini Ərəstun Mehdiyev, Naxçıvan Muxtar Respublikasının veteranlar təşkilatının sədri Firudin Süleymanov, Şəki şəhər veteranlar təşkilatının sədri Müstafa Əhmədov, Gəncə şəhər veteranlar təşkilatının sədri Yusif Məmmədov, Azərbaycan Milli Elmlər Akademiyasının professoru Bəhram Zahidov, Təşkilatın Nəzarət-Təvtiş Komissiyasının sədri Salman Babayev çıxış etmiş, Respublika Veteranlar Təşkilatının illik fəaliyyətini qənaətbəxş qiymətləndirmişlər. Sonra gündəliyin 2-ci məsələsi, RVT-nin 2019-cu ilə aid fəaliyyət planı barədə Təşkilatın sədr müavini, e/o polkovnik Cəlil Xəlilov qısaca məlumat çatdırmış, onun təsqdi olunması ilə bağlı təkliflər səsləndirilmişdir. Plan bəzi təkliflər nəzərə alınmaqla  qəbul olunmuşdur. Plenum işini başa çatdırmışdır.

Fransa və Hindistanın hərbi dəstəyi erməni toplumunun sabahına nə vəd edir? Fransanın Ermənistandakı səfiri Olivye Dekottini sosial mediada Ermənistan və onun “qədim dostları” ilə bağlı paylaşım edib. Səfir qeyd edib ki, “Fransa və Hindistan iki böyük demokratiya, iki hərbi və texnoloji güc və Ermənistanın iki köhnə dostudur”. Olivye Dekottininin dediyi kimi, Fransa və Hindistanı həqiqətən də Ermənistanla qədim təmaslara malik dövlətlər adlandrımaq olar. Çünki hər iki dövlət uzun müddət Ermənistanla sıx münasibətdə olub, ona siyasi-diplomatik, mənəvi-psixloji, bəzi hallarda isə hərbi baxımdan yardımlar edib. Və nə qədər qəribə görünsə də, Ermənistanın başına gələn bütün müsibətlərdə, üzləşdiyi bütün məğlubiyyət və uğursuzluqlarda hər iki dövlətin böyük rolu mövcuddur. Çünki məhz Fransa və Hindistanın İrəvana verdiyi hərbi-siyasi dəstək Ermənistanın anti-Azərbaycan siyasətinin geniş vüsət almasına səbəb olmuş, onu ölkəmizə qarşı yeni terror aktları və qarşıdurmalara həvəsləndirmişdir. 44 günlük Vətən müharibəsi tarixinə nəzər salsaq görərik ki, Ermənistan bu müharibə zamanı da öz ordusundan daha çox Kollektiv Təhlükəsizlik Müqaviləsi Təşkilatına, Rusiya, Fransa və s. kimi dövlətlərin dəstəyinə ümid etmiş, məhz bu səhvi onun faciəsinə çevrilmişdir. Xatırladaq ki, Vətən müharibəsi zamanı Ermənistana siyasi baxımdan dəstək ifadə edən Fransa və bəzi ölkələr proseslərə əməli baxımdan müdaxilə etməyə cəsarət etməmiş, nəticədə Ermənistan “qədim dostlarının” – Fransa və Hindistanın gözü önündə rüsvayçı məğlubiyyətə uğramışdır. Bu fakt bir daha sübut edir ki, Fransa və Hindistan tarixən Ermənistanı yeni avantüralara qızışdırmaqla onun ağır məğlubiyyətlərə düçar olmasına bais olmuşdur. Bu mənada, Fransanın Ermənistandakı səfiri Olivye Dekottininin Fransa və Hindistanı Ermənistanın “qədim dostları” adlandırması, hər iki ölkənin İrəvanı dəstəklədiyini gündəmə gətirməsi Ermənistan üçün yaxşı heç nə vəd etmir. Bu açıqlama onu göstərir ki, hər iki dövlət Cənubi Qafqazda öz maraqlarını müdafiə etmək üçün Ermənistandan alət kimi istifadə etmək siyasətinə sadiqdirlər və bu kimi açıqlamalarda məqsəd erməni toplumunu “qədim dost” nağılına inadırmaq, onlara cəsarət verərək yeni oyunlara daxil olmasını təmin etməkdir. Odur ki, erməni toplumu əsrlədir boyu davam edən bu nağıla inanmamalı, sabahlarına qan və göz yaşı vəd edən “dostların” onların ən böyük düşmənləri olduğunu anlamalıdır. Ermənistan anlamalıdır ki, Fransa və Hindistan kimi dostu olan ölkəyə düşmən lazım deyil. Nə indi, nə də heç vaxt... Seymur ƏLİYEV

Azərbaycan Respublikası Müharibə, Əmək və Silahlı Qüvvələr Veteranları Təşkilatının Rəyasət Heyəti beynəlxalq qurumları Ermənistan silahlı qüvvələrinin Azərbaycanın mülki əhalisinə qarşı törətdiyi növbəti təcavüz aktına görə işğalçı ölkə rəhbərliyini sərt şəkildə qınamağa çağıran bəyanat yayıb. AZƏRTAC xəbər verir ki, bəyanatda deyilir: “Ermənistan silahlı qüvvələrinin Ermənistan-Azərbaycan dövlət sərhədinin Tovuz rayonu istiqamətində Azərbaycan Silahlı Qüvvələrinin mövqelərini atəşə tutması dünyada sülhə və əmin-amanlığa növbəti təhdiddir. Son günlər Ermənistan silahlı qüvvələrinin atəşkəs rejimini mütəmadi şəkildə pozaraq Azərbaycan Ordusunun mövqelərini atəşə tutması hərbi qulluqçularımızın ölümünə və yaralanmasına səbəb olub. Eyni zamanda, Ermənistan məkrli və çirkin siyasətini davam etdirərək cəbhə bölgəsinə yaxın ərazilərdə yerləşən kəndlərin dinc əhalisini iriçaplı silahlardan və ağır artilleriyadan atəşə tutub. Nəticədə dinc sakinlər arasında da həlak olan və yaralananlar var. Belə ki, iyulun 12-də günorta saatlarından başlayaraq Ermənistan silahlı qüvvələri artilleriya qurğularından istifadə etməklə Tovuz rayonu istiqamətində Azərbaycan Silahlı Qüvvələrinin mövqelərini ələ keçirmək məqsədilə hücuma keçməyə cəhd göstərib”. Bildirilib ki, BMT Təhlükəsizlik Şurasının 822, 853, 874, 884 saylı qətnamələrinə bu günədək əməl etməyən, Azərbaycan torpaqlarını işğal altında saxlayan Ermənistanın ölkəmizin beynəlxalq səviyyədə tanınan ərazi bütövlüyünə növbəti təxribatı da yolverilməzdir. Dünya ictimaiyyəti bilməlidir ki, Dağlıq Qarabağ münaqişəsində işğalçı ilə işğala məruz qalana eyni səviyyədə yanaşma Azərbaycan xalqına qarşı ayrı-seçkilikdir. Azərbaycan Respublikası tolerant və multikultural dəyərləri ilə dünyada sülhün bərqərar olmasına daha çox səbir və qətiyyətlə yanaşıb. Ərazisi işğal altında olan və erməni atəşi altında yaşayan Azərbaycan xalqı daim dözüm nümayiş etdirib, münaqişənin dinc yolla həllinə çalışıb. Əfsuslar olsun ki, erməni tərəfi bu dəfə də Azərbaycanın humanizmindən öz mənfur əməlləri üçün istifadə edib. “Biz veteranlar bir daha dünya ictimaiyyətini, xüsusilə də Dünya Veteranlar Federasiyasını və digər nüfuzlu beynəlxalq qurumları respublikamızın BMT tərəfindən tanınmış ərazilərinin işğaldan azad olunması, Ermənistanın Azərbaycan ərazisində törətdiyi cinayətlərə layiqli hüquqi qiymət verilməsi və beynəlxalq hüquq normalarının pozulmasının qarşısının alınması, eləcə də Dağlıq Qarabağ münaqişəsi nəticəsində soydaşlarımızın pozulmuş hüquq və azadlıqlarının bərpası istiqamətində zəruri addımlar atmağa və təxirəsalınmaz tədbirlər görməyə çağırırıq”, - deyə müraciətdə vurğulanıb.

Bu gün Sumqayıtdakı Heydər Əliyev Mərkəzində “Vətənpərvərliyin təbliği istiqamətində görülən işlər və mənfi təzahürlər” mövzusunda dəyirmi masa keçirilib. Müharibə, Əmək və Silahlı Qüvvələr Veteranları Təşkilatının təşkilatçılığı ilə keçirilən tədbiri adıçəkilən qurumun Sumqayıt Şəhər Təşkilatının sədri Sovet Şükürov açıb. Onun təklifi ilə dövlətimizin ərazi bütövlüyü uğrunda həlak olan şəhidlərin xatirəsi bir dəqiqəlik sükutla yad edilib.   Çıxışında dövlətimizin qazilərə, müharibə əlillərinə, şəhid ailələrinə olan diqqətindən bəhs edən Sovet Şükürov, bütün bunların cəmiyyətdə də böyük məmnunluq doğurduğunu qeyd edib. Sumqayıt Şəhər Təşkilatının sədri qeyd edib ki, bu kateqoriyadan olan vətəndaşların qayğılarının diqqət mərkəzində saxlanılması, onların sosial rifahının daha da gücləndirilməsi dövlət siyasətinin prioritet istiqamətlərindən biridir. Respublikamızın hər yerində olduğu kimi, Sumqayıtda da bu istiqamətdə mühüm addımların atıldığını bildirən Sovet Şükürov, veteran və qazilərə göstərilən dəstəyə görə dövlət başçısına təşəkkür edib, Sumqayıt Şəhər İcra Hakimiyyətinin xidmətlərinə diqqət çəkib.   Bununla yanaşı, son vaxtlar bəzi şəxslərin qazi adından sui-istifadə etdiyini vurğulayan Sovet Şükürov, bu cür halların arzuedilməz olduğunu qeyd edib. Təşkilat sədri qeyd edib ki, öz hüquqlarının təminində hansısa problemlə üzləşən hər bri qazi bununla bağlı əlaqədar dövlət orqanlarına müraciət etməli, onu narahat edən məsələnin qanuni müstəvidə araşdırılmasına nail olmalıdır. Bu məsələdə Müharibə, Əmək və Silahlı Qüvvələr Veteranları Təşkilatının hər zaman qazilərə dəstək verməyə hazır olduğunu bildirən Sovet Şükürov, şəhid və qazilərin millətin baş tacı olduğunu bildirib.   Daha sonra geniş məruzə ilə çıxış edən Müharibə, Əmək və Silahlı Qüvvələr Veteranları Təşkilatının sədr müavini, polkovnik Cəlil Xəlilov qazilərə, o cümlədən şəhid ailələri və müharibə əlillərinə göstərilən dövlət qayğısına diqqət çəkib:   “Ölkəmizdə qazilərə, müharibə əlillərinə, şəhid ailələrinə dövlət tərəfindən yüksək diqqət və qayğının göstərildiyi hamıya məlumdur. Əminliklə söyləmək olar ki, Azərbaycan bu kateqoriyadan olan vətəndaşlara göstərilən diqqətə görə dünyanın ən qabaqcıl dövlətidir. Şəhid ailələri və qazilərə olan bu qayğı “Azərbaycan modeli” kimi bir çox dövlətlər tərəfindən öyrənilməkdədir. Lakin qazilərə, şəhid alələrinə qayğı göstərmək sadəcə dövlətin deyil, hər bir vətəndaşın borcudur və sevindiricidir ki, Azərbaycan cəmiyyəti bu baxımdan üzərinə düşən məsuliyyəti lazımınca dərk edir”.   Polkovnik qeyd edib ki, bütün müsbət tendensiyalara rəğmən, bəzən mənfi təzahürlərə də rast gəlinir ki, bunlardan da biri bəzi şəxslərin özünü heç bir əsas olmadan qazi kimi təqdim etməsi ilə bağlıdır:   “Təəssüflər olsun ki, bəzən heç bir əsas olmadan özünü qazi kimi təqdim edən, müxtəlif dövlət qurumlarına qarşı qanunsuz tələblərlə çıxış edən insanlara da rast gəlinir. Cəmiyyəti aldadan, eyni zamanda dövlətin bu istiqamətdə gördüyü işlərə kölgə salan bu şəxslər belə bir təsəvvür yaratmaq istəyirlər ki, guya onlar qazi olsa da, dövlət diqqətindən kənarda qalıblar. Son vaxtlar qazi adından sui-istifadə edən bir neçə bu cür şəxsin ifşa edilməsi söylədiklərimizə nümunədir.   Bu gün cəmiyətdə qaziləri öz ətrafında cəmləmək, onların adından, nüfuzundan şəxsi ambisiyalarını, çirkin məqsədlərini həyata keçirmək üçün istifadə etməyə çalışan qüvvələr mövcuddur. Qazilərimiz bu məsələdə diqqətli olmalı, belə qüvvələrdən uzaqda durmalı, kimlərinsə onlardan istifadə etməsinə imkan verməməlidir. Əgər onlar hansısa problemlə üzləşiblərsə, bunun həlli üçün əlaqədar dövlət qurumlarına müraciət etməli, problemin qanuni şəkildə həlli üçün hüquqi imkanlardan istifadə etməlidir. Bu məsələdə Müharibə, Əmək və Silahlı Qüvvələr Veteranları Təşkilatı qazilərimizə hər cür dəstək göstərməyə hazırdır. Əgər hər hansı bir qazi hansısa problemini həll etməkdə çətinliklə üzləşirsə, hansısa məmur tərəfindən süründürməçiliyə məruz qalırsa, o zaman təşkilatımıza müraciət edə bilər.Unutmamamlıyıq ki, irəli sürdüyümüz hər bir tələb, hər bir istək qanuna istinad etməli, qanuni olmalıdır. Bu, həmin tələbin reallaşması üçün ən başlıca amildir.   Mən bütün qaziləri, veteranları 44 günlük Vətən müharibəsində olduğu kimi bu gün də Ali Baş Komandanın ətrafında sıx birləşməyə çağırıram. Unutmayaq ki, uğura gedən yolumuz birliyimizdən, həmrəyliyimizdən keçir və bu birliyi qorumaq bizim üçün hər şeydən vacibdir”.   Tədbirdə çıxış edən Qarabağ Əlillər Cəmiyyətinin sədr müavini Nəzakət İsmayılova da dövlətin qazi və şəhid ailələrinə diqqətini qeyd etməklə yanaşı, bəzi qazilərin müxtəlif əsassız iddia və tələblərlə çıxış etdiyini bildirib. Nəzakət İsmayılova qeyd edib ki, əsl qazilər və şəhidlər vətəni heç bir təmənna ummadan, heç bir təmənna gözləmədən müdafiə ediblər və bununla da əsl vətən sevgisini nümayiş etdiriblər. Hansısa qanunsuz təklif və təmənna ilə çıxış etməyin qazi adına, qazi statusuna yaraşmadığını bildirən Nəzakət İsmayılova, bu məsələyə hər kəsin həssas və duyarlı yanaşmasının vacibliyini vurğulayıb.   Çıxışında şəhidləri dərin ehtiram hissi ilə yad edən Nəzakət İsmayılova qeyd edib ki, xalqın şəhidlərə olan borcu, şəhidlərə olan sevgisi əbədidir və bu sevgi əsrlər sonra da öz paklığını, ülviliyini qoruyub saxlayacaq, Azərbaycanın ərazi bütövlüyü uğrunda həlak olanlar minnətdarlıq hissi ilə xatırlanacaqdır.   Tədbirdə çıxış edən əmək veteranları və qazilər də dövlətin onlara olan qayğısını qeyd etməklə yanaşı, qazi adından sui-istifadənin yolverilməz olduğunu bildirib, bu cür hallara qarşı birgə mübarizənin zəruriliyini vurğulayıblar.   Tədbirin sonunda xatirə şəkli çəkilib.   Müharibə, Əmək və Silahlı Qüvvələr Veteranları Təşkilatının mətbuat xidməti