İşğal olunmuş ərazilərimizin düşməndən azad edilməsi istiqamətində uğurlu hərbi əməliyyatlarda iştirak edən şəxslərdən daha bir neçəsi ilə bağlı məlumat paylaşılıb. Bu barədə Əmək və Əhalinin Sosial Müdafiəsi Nazirliyi məlumat yayıb. Bildirilib ki, nazirliyin tabeliyində Dövlət Məşğulluq Agentliyinin 15 saylı Ərazi məşğulluq mərkəzinin əməkdaşı Meysəm Hüseynov, 1 saylı Ərazi məşğulluq mərkəzinin əməkdaşı Fuad Abbasov və 8 saylı Ərazi məşğulluq mərkəzinin əməkdaşı Ağarza Rəhimov iştirak ediblər.

Belarus Respublikasının müstəqillik günü ilə əlaqədar olaraq adıçəkilən ölkənin Azərbaycandakı səfirliyi Belarusun ərazi bütövlüyü uğrunda döyüşlərdə iştirak edən 13 azərbaycanlı veteranı təbrik edib. Bu münasibətlə Müharibə, Əmək və Silahlı Qüvvələr Veteranları Təşkilatında olan Belarus səfirliyinin nümayəndələri, veteranlara xoş arzularını çatdırıb, minnətdarlıqlarını ifadə ediblər.   Xatırladaq ki, İkinci Dünya müharibəsində xeyli sayda azərbaycanlı Belarus Respublikasının faşist işğalçılarından müdafiəsində yaxından iştirak edib, bu mübarizədə böyük qəhrəmanlıqlar göstərib.

Bu günlərdə Gəncə şəhərindəki “N” saylı hərbi hissədə Azərbaycan Respublikası Veteranlar Təşkilatının və Respublika Hərbi Prokurorluğunun birgə tədbirlər planına uyğun olaraq əsgər və zabitlərin vətənpərvərlik tərbiyəsinə həsr olunmuş elmi-praktiki konfrans keçirilmişdir. 400 nəfərədək hərbi qulluqçunun və Gəncə Qarnizonu Hərbi Prokurorunun müavini Ceyhun Cəfərovun iştirak etdiyi bu tədbirdə Respublika Vetreranlar Təşkilatının Beynəlxalq Əlaqələr və Xalqlar Arasında Dostluq daimi komissiyasının sədri Zahiddin Abbasov “ermənilərin azərbaycanlılara qarşı törətdikləri soyqırımlar bu günkü nəslin və gələcək nəsillərin yaddaşında əbədi həkk olunmalıdır” mövzusunda və Respublika Veteranlar Təşkilatının şöbə müdiri Telman Babayev “Münhen Təhlükəsizlik Konfransı: Respublika Prezidenti İlham Əliyevin erməni işğalçılarına və ermənipərəst qüvvələrə ünvanladığı mesajlar”  mövzusunda məruzələrlə çıxış etdilər. Zahiddin Abbasov öz məruzəsində ermənilərin 1905-1907, 1918-1920, 1948-1953 və 1988-1994-cü illərdə azərbaycanlılara qarşı planlı şəkildə həyata keçirdikləri soyqırımlardan, xalqımızın başına açdıqları müsibətlərdən ətraflı söhbət açdı. O, daha sonra ordumuzun regionda ən güclü ordulardan birinə çevrildiyini və işğal altında olan torpaqlarımızı hərbi yolla bir neçə günə azad etməyə qadir olduğunu qeyd edərək bildirdi ki, əgər sülh yolu ilə ərazi bütövlüyümüz bərpa edilməsə, yaxın gələcəkdə erməni faşistləri mütləq öz layiqli cavablarını alacaqlar. Telman Babayev isə öz məruzəsində diqqəti Respublika Prezidenti İlham Əliyevin Münhen Təhlükəsizlik Konfransı çərçivəsində keçirilən dəyirmi masadakı çıxışına və panel-müzakirədə ona ünvanlanmış sualları cavablandırmasına, eləcədə onun Əlcəzirə Televiziyasına verdiyi müsahibəyə yönəltdi. T.Babayev xüsusilə, Əlcəzirə Televiziyasına Prezidentin BMT-nin Təhlükəsizlik Şurasının Ermənistan-Azərbaycan-Dağlıq Qarabağ münaqişəsi ilə bağlı 1993-cü ildə qəbul etdiyi dörd qətnamənin icra edilməsinin regionda sülhün, əminəmanlığın bərqərar olunmasının vacibliyindən danışdığını qeyd etdi. Daha sonra məruzəçi dedi ki, Respublika Prezidenti BMT T.Ş.-nın 3 üzvü olan Minsk qrupunun həmsədrlərinin, özlərinin iştirakı ilə qəbul olunmuş qətnamələrin icra edilməsi üçün Ermənistana kifayət qədər təzyiq göstərmədiklərini vurğulamış, münaqişənin qətnamələr əsasında həll edilməsinin yeganə yol olduğunu, heç kimin təcavüzə bəraət qazandıra bilməyəcəyini göstərmişdir. Konfransda məruzələr əsasında Gəncə şəhər Veteranlar Təşkilatının sədri, ehtiyyatda olan polkovnik Yusif Məmmədov, Gəncə şəhəri Nizami rayon Veteranlar Təşkilatının sədri, Böyük Vətən Müharibəsi iştirakçısı Tofiq Hüseynov, Gəncə hərbi prokurorunun köməkçisi Elçin Məmmədov “N” saylı hərbi hissənin bölük komandiri polkovnik-leytenant Vüqar Həsənov, Qarabağ Müharibəsi veteranı Ramiz Əliyev və başqaları çıxış edərək öz ürək sözlərini dedilər və erməni işğalçılarından torpaqlarımızın azad edilməsi ilə bağlı tövsiyələrini verdilər. Tədbirin sonunda 95 yaşı yenicə tamam olmuş Gəncənin Nizami rayon Veteranlar Təşkilatının sədri, Böyük Vətən Müharibəsi iştirakçısı Tofiq Hüseynova təntənəli surətdə Respublika Veteranlar Təşkilatının “Veteran Həmrəyliyi” medalı təqdim edildi. Eyni zamanda nümunəvi hərbi xidmətə görə Respublika Veteranlar Təşkilatının fəxri fərmanları ilə “N” saylı hərbi hissənin leytenantı Tamerlan Mustafayev, sıravi əsgərlər Etibar Cabbarov və Mehdi Şahbazov da təltif olundular. 

Cəlil Xəlilov: “Beynəlxalq təşkilatlar Ermənistana təzyiq göstərməli, soydaşlarımızın aqibətinə aydınlıq gətirilməlidir”   Dünən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi “30 avqust - Beynəlxalq Məcburi Yoxaçıxma Qurbanları (itkin düşmüş şəxslər) Günü” ilə əlaqədar onlayn konfrans keçirib. Konfransı giriş sözü ilə açan Müşahidə Şurasının sədri, Milli Məclisin deputatı Azay Quliyev Ermənistanın təcavüzkar siyasəti nəticəsində xeyli sayda Azərbaycan vətəndaşının itkin düşdüyünü bildirib, Ermənistanın əsirlərə münasibətdə beynəlxalq hüquq qaydalarını ağır şəkildə pozduğunu qeyd edib.   Agentliyin Müşahidə Şurasının sədr müavini, Prezident Administrasiyasının məsul əməkdaşı Vüsal Quliyevin moderatorluğu ilə keçirilən konfransda Müharibə, Əmək və Silahlı Qüvvələr Veteranları Təşkilatının sədr müavini, polkovnik Cəlil Xəlilov da çıxış edib,  Ermənistanın məqsədli şəkildə girov və itkin vətəndaşlarımızla bağlı məlumatları Azərbaycanla bölüşməkdən imtina etdiyini bildirib.   Konfransdan sonra veteran.gov.az-a açıqlama verən polkovnik Cəlil Xəlilov Ermənistanın əsir və itkinlərə bağlı Azərbaycan tərəfini məlumatlandırmaqdan imtiana etməsini beynəlxalq hüququn rəsmi İrəvan tərəfindən növbəti dəfə pozulması kimi dəyərləndirib:   “Birinci Qarabağ müharibəsində Ermənistanın hərbi cinayətləri nəticəsində 4 minə yaxın sodyaşımız itkin düşüb ki, onların taleyindən bu günə qədər heç bir xəbər yoxdur. Daha dəqiq desək, Azərbaycan Respublikasının Əsir və İtkin Düşmüş, Girov Götürülmüş Vətəndaşlarla əlaqədar Dövlət Komissiyası tərəfindən 3171 nəfəri hərbçi, 719 nəfəri isə mülki şəxs olmaqla, ümumilikdə 3890 nəfər itkin düşmüş şəxs kimi qeydiyyata alınıb.   Onu da qeyd edim ki, itkin düşmüş mülki şəxslərdən 20 nəfəri qız olmaqla 71 nəfəri yetkinlik yaşına çatmamış uşaq, 154 nəfəri ahıl olmaqla 267 nəfəri qadındır. 3890 nəfərdən 872 nəfərinin, o cümlədən 29 uşağın, 98 qadının, 112 ahıl şəxsin əsir-girov götürülməsi uzun illərdir ki, Azərbaycanı narahat edən məsələdir. Ancaq təəssüflər olsun ki, Ermənistan bugünə qədər də həmin vətəndaşlarımızın aqibətinə aydınlıq gətirmir, onlarla bağlı məlumatları gizlədir. Halbuki, bu, beynəlxalq hüquqla cinayətdir və Ermənistan üçün məsuliyyət doğuran bir haldır”.   Cəlil Xəlilov qeyd edib ki, Ermənistanın bu davranışları əlaqədar beynəlxalq təşkilatlar tərəfindən də qınanmalı, rəsmi İrəvana təzyiq göstərilməlidir:   “Təbii ki, Ermənistanın hüquqdan və insanlıqdan uzaq olan bu davranışına beynəlxalq təşkilatlar da biganə qalmamalı, rəsmi İrəvana təzyiqlər göstərməli, onu vaxtiylə əsir və girov düşmüş soydaşlarımız haqqında məlumat verməyə məcbur etməlidir. Unuitmaq olamz ki, baş verənlər insan hüquqları ilə bilavasitə bağlıdır və bu hüquqların təmin edilməsində, itkin və əsir düşən soydaşlarımızın aqibətinə aydınlıq gətirməkdə bütün bəşəriyyət, bütün insanlıq maraqlı olmalıdır”.   Polkovnik Cəlil Xəlilov rəhbərliyində təmsil olunduğu təşkilatın İkinci Dünya müharibəsində itkin düşən azərbaycanlılar haqqında məlumatların əldə edilməsi istiqamətində mühüm işlər həyata keçirdiyini qeyd edib:   “Müharibə, Əmək və Silahlı Qüvvələr Veteranları Təşkilatı olaraq bugünə qədər İkinci Dünya müharibəsində iştirak edən, müharibə zamanı itkin düşən yüzlərlə soydaşımızın aqibətinin müəyyən olunması istiqamətində mütəmadi addımlar atmışıq. Məhz görülən işlərin sayəsində Rusiya, Ukrayna, Belarus, Moldova, Serbiya və digər ölkələrin ərazisində döyüşlərdə iştirak edən xeyli sayda soydaşımız haqqında konkret məlumatlar əldə edilib, onların dəfn olunduğu yerlər müəyyənləşib. Kalininqradın müdafiəsində iştirak edən 400 nəfər soydaşımızın kimliyi müəyyən olunub, habelə Moldovada, Moskva ətrafıdna döyüşlərdə həlak olan sodyaşlarımızın xatirəsinə abidələr ucaldılıb.   Bu baxımdan Birinci Qarabağ müharibəsində itkin düşən soydaşlarımızın aqibətinin müəyyənləşdirilməsi ən aktul məsələlərdən biridir və təşkilatımız bu müstəvidə də əlindən gələni etməyə hazırdır.   Birinci Qarabağ müharibəsində əsir və itkin düşən soydaşlarımızla bağlı məlumatlaırn əldə olunmasında Ermənistanda fəaliyyət göstəərn beynəlxalq QHT-lərin, habelə ikinci, üçüncü dövlətlərin də imkanlarından maksimum istifadə edilməlidir”.   Cəlil Xəlilov 44 günlük Vətən müharibəsi nəticəsində Birinci Qarabağ müharibəsində ermənilər tərəfindən şəhid edilən bir sıra hərbçilərimizin dəfn olunduğu yerlərin də müəyyən olunduğunu xatırladıb, bu istiqamətdə daha əhatəli addımların atılmasının zəruriliyini qeyd edib.   Daha sonra sədr müavini bu cür konfransların keçrilməsinin vacibliyinə diqqət çəkib:   “Bu cür konfransların keçirilməsinin çox mühüm əhəmiyyəti mövcuddur. Bu, hər şeydən əvvəl Azərbaycanın haqq səsinin dünyaya çatdırılması, öz mövqeyini bir kəs daha ortaya qoyması deməkdir. Bu, həm də dünya ictimaiyyətinə, beynəlxalq təşkilatlara öz məsuliyyətlərini xatırladan bir addımdır. Ümid edirəm ki, heç olmasa bundan sonra dünyanın aparıcı dövlətləri, beynəlxalq təşkilatlar Azərbaycanın bu narahatlığını anlayacaq, minlərlə soydaşımızın taleyinə münasibətdə biganəlik sərgiləməyəcək”.   Seymur ƏLİYEV