Elə bil indiyədək heç yaşamamışıq. Gözümüz indi, məhz indi, bu günlərdə açılıb... Nə gözəlmiş yaşamaq haqqı, sevinmək haqqı, qürurlanmaq haqqı... Yaşamağın bir adı da Qürurmuş... O biri adı Şərəf... Koronaviruslu 2020-ci ili heç bəyənməmişdik, xatırlayırsınız? Hətta ömrümüzdən saymayacağımızı deyirdik. Pandemiyanın planlarımıza əngəl olmasından şikayətlənirdik. Amma həyatımızın ən gözəl, ən dəyərli ili olmaqdadır 2020: Ən Yeni Tarix yazılır bu günlərdə... Torpaqlarımız işğaldan azad olunur!!! Şərəfimiz, Qürurumuz, Heysiyyətimiz yenilənir. Bərpa olunuruq sanki... Artıq sevə bilirik! Bütün varlığımızla sevirik bu məmləkəti. Ali Baş Komandanımız 30 ildir tamarzı olduğumuz möhtəşəm duyğular yaşadır bizə. Biz Qalib gəlirik, təsəvvür edirsiniz?!. Biz qalibik, təsəvvür etmək belə lazım deyil, gözümüzlə görürük Qələbəni - işğaldan azad olunan Qarabağı... Yaralı Qarabağı... Şöhrətli Qarabağı... Cəbrayılı, Ağdərəni, Füzulini, Hadrutu, Xocavəndi.... Şuşanı, Xankəndini, Laçını, Kəlbəcəri... Qubadlını, Zəngilanı, Ağdamı, Xocalını... Ayaq səslərini eşidirsiniz?! Addım-addım yaxınlaşmağımızı, qovuşmağımızı... Bu gözəl, çox gözəl, fövqəladə gözəl və möhtəşəm günlərdə - şərəfli tariximiz yazılan bu əziz günlərdə təkrar-təkrar ifadə etdiyim və etmək istədiyim kəlmələr bunlardır: Cənab Ali Baş Komandanım, Sizi çox sevirəm! Sizi çox sevirik!!! Bizim Liderimiz, Xilaskarımız, Qarabağımız!!! İlham Əliyev. Bu ölkədə Sevgiyə və Sayğıya, ən ali, ən ülvi münasibətə, rəğbətə, xoşgörüyə ən layiqli Birinci şəxs məhz odur. Sevgilərimiz və Dualarımız Ona ünvanlıdır!!! Çünki... Qarabağ çox yox, 20 gün öncəyədək bizimçün arzu, xəyal və solğun ümid, hətta ümidsizlik idi. Arzularımızı, Ümidlərimizi, Xəyallarımızı O gerçəkləşdirir! Bayrağımızı O dalğalandırır işğaldan azad olunan torpaqlarımızda! Tariximizi və taleyimizi dəyişdirir O. Yadların və yadellilərin bizə yazdığı dəhşətli və dözülməz tarixi-taleyi... Adam kimi Adamdır O! Qəhrəmandlr, qəhrəmanımızdır O! Rəisimiz, Komutanımız, Sərkərdəmizdir. Qalib Ali Baş Komandanımızdır. Möcüzədir varlığı. Nə yaxşı ki, var. Nə yaxşı ki, bizimdir, bizə aiddir!!! Bayraqdır O, Ordudur O, Vətəndir O, Dövlətdir O! Azərbaycandır O!!! Sizi çox, çox, lap çox, hədsiz çox sevirik, Bayraq Adam, Ordu Adam, Vətən Adam, Dövlət Adam! Tanrıya sonsuz şükranlarımızın səbəbi! Bizi heçliyin, yoxluğun, gücsüzlüyün, güvənsizliyin girdabından çıxaran Adam! Birləşdirən, bütünləşdirən, bütövləşdirən Adam! Son 250 illik tariximizdə - Nadir şahdan üzü bu yana yalnız itirdik - ərazilərimiz, coğrafiyamız kiçildi, işğal olundu, yağmalandı. Çox səbəblər oldu - bizdən asılı olan və olmayan: daha çox olmayan... Fəth olmadı. İtkilər oldu. Torpaq itkisi... Qürur itkisi... Mənəviyyat itkisi... Amma indi... gözümüzün önündə baş verənlər şok effekti yaradır izlədikcə: Prezident İlham Əliyev torpaqlarımızı-itirdiklərimizi geri alır, Qarabağı fəth edir. Qürurumuzu, Şərəfimizi, Heysiyyətimizi qaytarır. Qarabağı qaytarır. “Şuşasız olmaz” deyir!!! Özü də “Müqəddəs Şuşa” deyir. Bilir ki, Şuşa açardır. Şuşa mənəviyyatımızın paytaxtıdır. Şuşa olmazsa, olmaz. Şuşasız olmaz! Varlığımızın, mövcudluğumuzun, qan yaddaşımızın, ilham mənbəyimizin sirri ordadır - Şuşada... Bu gözəlliyi, bu əzəməti, bu ruhaniyyəti təsvir və ifadə etməyə söz acizdir: Şükranlığı və minnətdarlığı; Sevgini və heyranlığı... Heyrəti... Xoşbəxtliyi... Sevinci... Fərəhi... Boynubükük, gözləriylə kədər və iztirab daşıyan bir topluma xoşbəxtliyi və qüruru yaşatmaq... bilirsiniz, nə deməkdir?! Heç bilirsiniz Millətə qol-qanad olmaq, nəfəs olmaq, ruh olmaq nə deməkdir?! Millətin boyunu ucaltmaq, başını dikəltmək, köksünü qabartmaq nə deməkdir, bilirsiniz?! Millətə can vermək, Milləti diriltmək, Yeri Göy etmək nə deməkdir, bilirsiniz?! Bilirsiniz bu millətə Oğul olmaq, Sərkərdə olmaq, Ordu olmaq, Qəhrəman olmaq nə deməkdir?! Bilirsiniz... Bizim Hekayəmiz başlayıb, Millət, gözümüz aydın! Millət, Qarabağın mübarək! Bəxtəvərliyin, səadətin mübarək!!! Bizim Hekayəmiz yazılır! Bu hekayəni yazana, yazdırana haqqımız halal olsun! Min dəfə, yüz min dəfə, milyon dəfə halal olsun!!! Doğma Adam, Əziz Adam, Böyük Adam, Qalib Adam, Qələbə Adam!!! Bizim Adam!!!

Hər bir cəmiyyətdə ictimai asayişin və vətəndaşların təhlükəsizliyinin təminində polisin müstəsna rol oynadığı birmənalıdır. Polisin “adi” hüquqpozmalardan tutmuş ağır və xüsusilə ağır cinayətlərə qədər ən müxtəlif qanun pozuntularına qarşı apardığı mübarizə vətəndaşların konstitusyon hüquqlarının qorunmasını təmin edir, fərdi təhlükəsizlikdən tutmuş ictimai təhlükəsizliyə qədər hər cür təhdid və təhlükəni zərərsizləşdirir. Bu mənada Azərbaycan polisinin qanunla ona həvalə edilən missiyanın üzərindən yüksək peşəkarlıqla gəldiyi şübhəsizdir. Bu gün daxili ilər orqanlarının əməkdaşları cinayətkarlığın bütün növ və üsullarına qarşı effektiv mübarizə aparır ki, bunlardan da biri narkotik vasitələrin qanunsuz dövriyyəsinə qarşı mübarizədir.   Polis cəmiyyətin fiziki və mənəvi sağlamlığının keşiyində! Müasir dünyamızda narkotik vasitələrin qanunsuz dövriyyəsinə qarşı mübarizə, bu problemin kəskinləşməsi baxımından ciddi aktuallıq kəsb etməkdədir. Cəmiyyəti fiziki və mənəvi baxımdan şikəst etmək hesabına milyonlar qazanmağa cəhd edən cinayətkar dəstələr, bəzi hallarda həm də ölkəmizdən narkotiklərin daşınmasında tranzit kimi istifadə etməyə çalışır. Bu baxımdan Azərbaycan polisinin ayıq-sayıqlığı, xidməti peşəkarlığı sadəcə vətəndaşlarımızın deyil, həm də digər xalqların təhlükəsizliyinin təmini baxımından həyati əhəmiyyət kəsb edir. Sevindiricidir ki, mövcud statistika hüquq-mühafizə orqanlarının əməkdaşlarının narkotiklərin qanunsuz dövriyyəsinə qarşı effektiv mübarizə apardığını, bu sahədə böyük uğurlara nail olduğunu göstərir. Bu mübarizənin miqyas və nəticələri haqqında daha aydın təsəvvürə malik olmaq üçün cari ilin may ayında narkotik vasitələrin qanunsuz dövriyyəsinə qarşı görülən işlərə nəzər salmaq kifayətdir. Xatırladaq ki, 2024-cü ilin may ayında narkotiklərin qanunsuz dövriyyəsinə qarşı mübarizə məqsədilə ölkə ərazisində toplam 31 əməliyyat həyata keçirilib. Bu əməliyyatlar nəticəsində “qara bazar”dan dəyəri 13 milyon manat olan narkotik çıxarılıb, 4 mütəşəkkil dəstə zərərsizləşdirilib, 39 nəfər həbs edilib. Bütün bu rəqəmlər Azərbaycan polisinin narkotik alverçilərinə qarşı sistemli və səmərəli mübarizəsindən xəbər verir. Polis milli-mənəvi dəyərlərimizin müdafiəçisidir! Qeyd edək ki, ölkəmizdə polis həm də milli-mənəvi dəyərlərin müdafiəçisi rolunda çıxış edir. Hansı ki, Prezident İlham Əliyev öz çıxışlarında dəfələrlə milli-mənəvi dəyərlərin qorunmasının xalqımızın və dövlətimizin gələcəyi baxımından həyati əhəmiyyət kəsb etdiyini bildirib, xalqımızın 44 günlük Vətən müharibəsində məhz bu dəyərlər sayəsində qalib gəldiyini vurğulayıb. Bu isə o deməkdir ki, polisin xalqımızın mənəvi dəyərlərinin keşiyində dayanması, milli əxlaq və dəyərlərə zidd olan hallara qarşı ciddi mübarizə aparması daxili işlər orqanı əməkdaşlarının milli dövlətçiliyimiz qarşısındakı tarixi xidmətidir. Onu da qeyd edək ki, polis əməkdaşları milli-mənəvi dəyərləri nümayişkəranə şəkildə pozan, qeyri-etik addımlar atan, əxlaqa zidd çağırışlar edən bu cür şəxslərə qarşı həm real həyatda, həm də internet resurslarında  - müxtəlif sosial şəbəkələrdə aktiv mübarizə aparır. Bu mübarizədə məqsəd qeyri-etik danışıq və davranışları ilə ictimai əxlaqa zidd addımlar atan şəxsləri cəzalandırmaqla yanaşı, həm də gənc nəsli bu cür zərərli təsirlərdən qorumaq, xalqımızın sağlam gələcəyini təmin etməkdir.  Bir sözlə, bu gün Azərbaycan polisinin çoxşaxəli fəaliyyəti ölkəmizdə ictimai sabitlik və təhlükəsizliyin təmini ilə yanaşı, həm də sağlam cəmiyyət və gəncliyin formalaşmasına hesablanıb ki, bu da ikiqat uğur, ikiqat nailiyyətdir. 2 iyul – Polis Günü ilə əlaqədar olaraq bütün polis əməkdaşlarını təbrik edir, onların hər birinə xidməti fəaliyyətlərində uğurlar arzulayırıq.

“Azərbaycan Respublikası Prezidentinin köməkçisi, Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyevin ABŞ-ın “Newsweek” nəşrində dərc olunmuş məqaləsində bütün dünyanı “COP atəşkəsi”nə dəvət etməsi dövlətimizin sülhpərvər siyasətinin göstəricisidir”. Bunu saytımıza açıqlamasında Müharibə, Əmək və Silahlı Qüvvələr Veteranları Təşkilatının sədri polkovnik Cəlil Xəlilov bildirib. Polkovnik qeyd edib ki, bu təklif Azərbaycanın bütün bəşəriyyətin mənafeyini dünüşdüyünü, dünyada müharibə və zorakılığa son qoymaq arzusunu əks etdirir: “Azərbaycan hər zaman öz xarici siyasətində milli maraqlarla yanaşı, həm də  ümumbəşəri maraqları əsas götürüb, bütün insanlığın xeyrinə olan qərarlar qəbul edib. Biz bunu yaxın tarix keçmişimizin hər bir mərhələsində, eləcə də pandemiya dönəmində gördük. Azərbaycan o zaman da bütün dünya üçün ədalət tələb etdi, “vaksin inhisarçılığına” qarşı mübarizə kampaniyasına start verdi. Bu gün də ölkəmiz COP29 çərçivəsində planetimizin ekoloji təhlükəsizliyini təmin etməyə, iqlim dəyişikliyinin qarşısını almağa, təbiətin mühafizəsi və bərpası istiqamətində irimiqyaslı addımlar atmağa çalışır. Bununla yanaşı, ölkəmiz yaranmış fürsətdən istifadə edərək dünyadakı münaqişə və müharibələri müvəqqəti də olsa dayandırmağa, bütün münaqişə tərəflərini “COP atəşkəsinə” cəlb etməyə çalışır. Məqsəd bütün dünyada sülh və sabitliyi təmin etmək, müharibəyə, göz yaşı və iztiraba son qoymaqdır. Azərbaycan Respublikası Prezidentinin köməkçisi, Azərbaycan Respublikası Prezidentinin Administrasiyasının Xarici siyasət məsələləri şöbəsinin müdiri Hikmət Hacıyevin dövlətimiz adından növbəti dəfə gündəmə gətirdiyi bu təklif də ölkəmizin xoş niyyətinin təcəssümüdür. Ümid edirəm ki, dünya dövlətləri, beynəlxalq ictimaiyyət ölkəmizin bəşəriyyətin rifahına və təhlükəsizliyinəm olan həssaslığını lazımınca qiymətləndirəcək, dövlətimiz tərəfindən irəli sürülən təklifi dəstəkləməklə planetimizin hər yerində sülhün bərqərar olmasına töhfə verəcəklər”. Seymur ƏLİYEV

Şuşa şəhərini Azərbaycan mədəniyyətinin paytaxtı elan edirəm. Publika.az-ın məlumatına görə, bunu Prezident İlham Əliyev yanvarın 5-də Anar Kərimovu mədəniyyət naziri təyin olunması ilə əlaqədar videoformatda qəbul edərkən çıxışı zamanı deyib. Dövlət başçısı bildirib: "Şuşa şəhəri buna layiqdir. Hesab edirəm ki, nəinki Azərbaycanın, bölgənin mədəni paytaxtı sayıla bilər. Şuşanın mədəni həyatı zəngin olmalıdır. Şuşanın bərpası ilə əlaqədar işlərə artıq start verildi. Mənim göstərişimlə böyük heyət oraya ezam edildi. Deməli, yaşayış fondunun, tarixi abidələrin təftişi aparılmalı, vurulmuş ziyan dəqiq hesablanmalıdır və biz Şuşa şəhərinin restavrasiyasına başlamalıyıq. Ancaq yenə də vaxt itirmədən, ancaq, eyni zamanda, tələsmədən Şuşanın ilkin siması, tarixi siması bərpa edilməlidir. O cümlədən Şuşada yerləşən məscidlərimiz əsaslı şəkildə təmir edilməlidir, bərpa olunmalıdır, onların öz siması qaytarılmalıdır. Ermənilər bizim 60-dan çox məscidi məhv ediblər. Ağdam məscidində donuz, inək saxlayırdılar. Bu yaxınlarda hansısa erməni jurnalist tərəfindən internetdə dərc edilən foto bütün Azərbaycan xalqını bir daha hiddətləndirdi. O fotoda Azərbaycan xalqının cəlladı, Ermənistanın keçmiş prezidenti Köçaryan zəbt edilmiş, işğal olunmuş Ağdam şəhərində bizim məscidimizin önündə öz əlaltıları, quldurları ilə dayanıb. Ağdam məscidinin üzərində isə təhqiredici yazılar görünür. Görün, kim rəhbərlik edib Ermənistana, hansı cəllad, hansı alçaq mənəviyyat sahibi?! Şəhəri dağıdıblar, məscidimizi təhqir ediblər. Məscidimizə inək, donuz doldurublar, məscidin divarlarına isə dinimiz haqqında, xalqımız haqqında təhqiramiz ifadələr yazıblar. Məscidi təhqir edən, məscidin üzərində təhqiramiz rəsmlər çəkdirən, sözlər yazan Köçaryan budur. Onun əlaltısı və quyruğu Sarkisyan, onlar dağıdıblar bizim şəhərlərimizi iyirmi il ərzində. Bizim şəhərlərimiz müharibə dövründə dağıdılmayıb. Müharibə dövründə şəhərləri belə dağıtmaq mümkün deyil. Müharibədən sonra işğal dövründə bütün binaları, bütün yaşayış yerlərini söküblər. Onlar vandallardır, barbarlardır. Amma iyirmi il Ermənistana rəhbərlik ediblər".