Please ensure Javascript is enabled for purposes of website accessibility
Azərbaycan Respublikası Müharibə, Əmək və Silahlı Qüvvələr Veteranları Təşkilatı
Veteranların təcrübəsindən biz daim bəhrələnməliyik, istifadə etməliyik
Heydər Əliyev

Veteranların hüquq və qanuni mənafelərinin müdafiəsi diqqət mərkəzində

Veteran.gov.az xəbər verir ki, 19 noyabr 2026-cı il tarixində Azərbaycan Respublikası Müharibə, Əmək və Silahlı Qüvvələr Veteranları Təşkilatının sədri polkovnik Cəlil Xəlilovun təşəbbüsü ilə Təşkilatın inzibati binasında veteranlarla vəkillərin görüşü keçirilib.

Tədbirdən əvvəl Azərbaycan Respublikasının Dövlət Himni səsləndirilib, Vətənimizin azadlığı və suverenliyi uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.

Tədbirdə çıxış edən Azərbaycan Respublikası Müharibə, Əmək və Silahlı Qüvvələr Veteranları Təşkilatının sədr müavini, ədliyyə polkovniki İmran Əhmədov görüşün əhəmiyyətindən bəhs edərək bildirib ki, bu tədbirin keçirilməsində əsas məqsəd veteranların hüquq və qanuni mənafelərinin müdafiəsinə dəstək göstərmək, onların hüquqi maarifləndirilməsini təmin etmək, gündəlik həyatlarında qarşılaşdıqları hüquqi problemlərin həlli istiqamətində müvafiq köməklik göstərməkdir.

İ.Əhmədov qeyd edib ki, Vətən qarşısında böyük xidmətləri olan veteranlara diqqət və qayğı göstərilməsi, onların sosial və hüquqi problemlərinin həllinə dəstək verilməsi hər zaman dövlətin və cəmiyyətin diqqət mərkəzində olmalıdır. Onun sözlərinə görə, veteranların üzləşdikləri hüquqi məsələlərin vaxtında araşdırılması, müraciətlərinə həssaslıqla yanaşılması və qanunvericiliyə uyğun həll yollarının müəyyənləşdirilməsi xüsusi əhəmiyyət daşıyır.Sədr müavini vurğulayıb ki, vəkillərlə veteranların birbaşa görüşünün təşkili bu baxımdan mühüm addımdır. Belə görüşlər veteranların hüquqi biliklərinin artırılmasına, onları narahat edən məsələlərin peşəkar hüquqşünaslarla müzakirəsinə, eləcə də hüquqlarının müdafiəsi istiqamətində konkret addımların atılmasına geniş imkan yaradır.

İ.Əhmədov, həmçinin vəkillərin veteranların müraciətlərinə göstərdikləri diqqətin və hüquqi dəstəyin əhəmiyyətini qeyd edərək, bu cür əməkdaşlığın gələcəkdə də davam etdirilməsinin vacibliyini diqqətə çatdırıb. O, görüşdə iştirak edən vəkillərə təşəkkürünü bildirərək, veteranların hüquqi problemlərinin həllinə yönəlmiş bu təşəbbüsün səmərəli nəticələr verəcəyinə əminliyini ifadə edib.

Tədbirdə çıxış edən Azərbaycan Respublikası Müharibə, Əmək və Silahlı Qüvvələr Veteranları Təşkilatının hüquq məsləhətçisi, vəkil Vüsalə Cəfərli ilk növbədə veteranlarla vəkillərin bir araya gəlməsinə, onların hüquqi problemlərinin dinlənilməsinə və müvafiq dəstəyin göstərilməsinə şərait yaratdığına görə Təşkilatın sədrinə, sədr müavininə, eləcə də Azərbaycan Respublikası Vəkillər Kollegiyasının sədrinə təşəkkür və minnətdarlığını bildirib.

V.Cəfərli çıxışında qeyd edib ki, xüsusilə həyat təcrübəsi və Vətən qarşısında xidmətləri ilə seçilən veteranların müraciətlərinə həssaslıqla yanaşılması, onların hüquq və qanuni mənafelərinin qorunması hər bir hüquqşünas üçün mühüm vəzifə olmalıdır. Veteranların qarşılaşdıqları hüquqi çətinliklərin aradan qaldırılmasına dəstək göstərilməsi, onların dövlət qurumlarına müraciətlərinin hazırlanmasında köməklik edilməsi və hüquqi məsələlərdə düzgün istiqamətləndirilməsi hüquqi yardımın əsas istiqamətlərindəndir. V.Cəfərli görüş çərçivəsində veteranların hər bir müraciətinə diqqətlə yanaşılacağını, qaldırılan məsələlərin hüquqi baxımdan araşdırılmasının və mümkün həll yollarının müəyyənləşdirilməsinin vacibliyini qeyd edib. Vəkil belə təşəbbüslərin davamlı xarakter daşımasının veteranların hüquqi müdafiəsinin gücləndirilməsinə və onların hüquq və qanuni mənafelərinin daha etibarlı təmin olunmasına mühüm töhfə verəcəyinə inamını ifadə edib.

Görüş çərçivəsində Təşkilatın sədr müavini İmran Əhmədov, Azərbaycan Respublikası Vəkillər Kollegiyasının Rəyasət Heyətinin üzvü, Qadın Vəkillər Alyansının sədri Dilarə Əfrasiyab, vəkillər Manya Əhmədli, İradə Hacıyeva, Xəyalə Məmmədova və Təşkilatın hüquq məsləhətçisi, vəkil Vüsalə Cəfərli veteranların müraciətlərini dinləyib, onları narahat edən hüquqi və digər məsələlərlə yaxından maraqlanıblar.

Vətəndaşların qaldırdıqları məsələlər ətraflı müzakirə olunub, onları maraqlandıran suallar cavablandırılıb, mövcud problemlərin qanunvericiliyin tələblərinə uyğun həlli istiqamətində müvafiq hüquqi izahat və məsləhətlər verilib. Bununla yanaşı, veteranlara hüquqi sənədlərin hazırlanmasında, aidiyyəti dövlət qurumlarına müraciətlərin tərtib edilməsində və hüquqlarının müdafiəsi üçün zəruri prosedurların həyata keçirilməsində birbaşa praktiki köməklik göstərilib.

Görüş zamanı bir sıra veteranların müraciətlərində qaldırılan məsələlərin əlavə araşdırılmasına ehtiyac olduğu müəyyən edilib. Həmin müraciətlərin araşdırılması və müvafiq hüquqi dəstəyin göstərilməsi tədbirdə iştirak edən vəkillər tərəfindən öz üzərinə götürülüb.

Tədbirin sonunda Azərbaycan Respublikası Müharibə, Əmək və Silahlı Qüvvələr Veteranları Təşkilatının sədri, polkovnik Cəlil Xəlilov görüşdə iştirak edən vəkilləri qəbul edib.Qəbul zamanı Cəlil Xəlilov veteranların hüquq və qanuni mənafelərinin müdafiəsi istiqamətində göstərilən diqqət və dəstəyə görə vəkillərə dərin təşəkkürünü bildirib. O, qeyd edib ki, veteranlara ehtiram və qayğı göstərilməsi yalnız mənəvi borc deyil, həm də onların qarşılaşdıqları problemlərin həllinə real dəstək verməyi, hüquqlarının qorunmasını və qanuni mənafelərinin təmin olunmasını tələb edir.Təşkilat sədri vəkillərin veteranlarla birbaşa görüş keçirməsini, onların müraciətlərini dinləməsini, hüquqi məsələlərə peşəkar yanaşma nümayiş etdirməsini yüksək qiymətləndirib. Bildirib ki, bu cür görüşlər veteranların hüquqi müdafiəsinin gücləndirilməsi, onların dövlət qurumlarına müraciətlərinin düzgün istiqamətləndirilməsi və qarşılaşdıqları problemlərin qanunvericiliyə uyğun həlli baxımından mühüm əhəmiyyət daşıyır.

C.Xəlilov xüsusilə vurğulayıb ki, veteranlar Azərbaycan dövlətinin və xalqının qarşısında böyük xidmətləri olan insanlardır və onların hər zaman diqqət və qayğı ilə əhatə olunması vacibdir. Bu baxımdan, vəkillərin öz peşə bilik və təcrübələrini veteranların hüquqlarının müdafiəsinə yönəltməsi təqdirəlayiq təşəbbüsdür.

Təşkilat sədri gələcəkdə də Vəkillər Kollegiyası ilə əməkdaşlığın davam etdirilməsinin əhəmiyyətini qeyd edib, görüşün təşkilində və keçirilməsində əməyi olan bütün vəkillərə bir daha minnətdarlığını bildirərək, onların fəaliyyətində uğurlar arzulayıb.

2026-11-20 12:57:00
156 baxış

Digər xəbərlər

Polkovnik İlqar Əhmədoğlu Quliyevin anadan olmasının 70 illiyinə həsr olunan anım tədbiri keçirilib

Azərbaycan Respublikası Müharibə, Əmək və Silahlı Qüvvələr Veteranları Təşkilatının təşkilatçılığı ilə Azərbaycan təhlükəsizlik orqanlarının polkovniki, yazıçı-publisist İlqar Əhmədoğlu Quliyevin (1956–2025) anadan olmasının 70 illiyinə həsr olunan anım tədbiri keçirilib. Tədbir mərhum polkovnikin həyat və fəaliyyətini əks etdirən videoçarxın nümayişi ilə başlayıb. Daha sonra çıxış edənlər İlqar Quliyevin zəngin həyat yolu, dövlət təhlükəsizliyi orqanlarındakı fəaliyyəti və publisistik yaradıcılığı barədə fikirlərini bölüşüblər. Tədbirin sonunda mərhumun ailə üzvləri, müəllimi və qələm dostları çıxış ediblər. Ailə üzvləri İlqar Quliyevin xeyirxah əməlləri ilə qürur duyduqlarını bildirərək, onun xatirəsinin daim ehtiramla yad ediləcəyini qeyd ediblər.   

Hamısını oxu
Bakı Konqres Mərkəzində “Nəsillərin görüşü” adlı konfrans keçirilib

Konfransın sonunda Prezident İlham Əliyevə müraciət ünvanlanıb   Veteran.gov.az xəbər verir ki, bu gün saat 11:00 radələrində Bakı Konqres Mərkəzində Müharibə, Əmək və Silahlı Qüvvələr Veteranları Təşkilatının təşkilatçılığı ilə “Nəsillərin görüşü” adlı konfrans keçirilib.   Azərbaycanın 44 günlük Vətən müharibəsində qazandığı şanlı qalibiyyətə həsr edilən konfransı giriş sözü ilə açan Müharibə, Əmək və Silahlı Qüvvələr Veteranları Təşkilatının sədri Fatma Səttarova tədbir iştirakçılarını salamlayıb, Azərbaycan xalqının tarixi zəfəri münasibəti ilə bir araya gəlməkdən məmnunluğunu bildirib.   Giriş sözünün ardınca Azərbaycan Respublikasının Dövlət Himni səsləndirilib, dövlətimizin ərazi bütövlüyü uğrunda həyatını qurban verən şəhidlərin xatirəsi bir dəqiqəlik sükutla yad edilib. Daha sonra Qeyri-Hökumət Təşkilatlarına Dövlət Dəstəyi Agentliyin Müşahidə Şurasının sədr müavini, Prezident Administrasiyasının məsul əməkdaşı Vüsal Quliyev çıxış edib. Çıxışında 44 günlük Vətən müharibəsində əldə edilən tarixi zəfərin xalqımızın sadəcə bugünü deyil, həm də gələcəyi baxımından müstəsna rol oynadığnı bildirən Vüsal Quliyev, xalqımızı bu zəfərə qovuşduran Ali Baş Komandana, şanlı ordumuza, şəhidlərimizə və qazilərimizə minnətdarlığını ifadə edib.   Vüsal Quliyev qeyd edib ki, 44 günlük Vətən müharibəsində əldə edilən bu qələbə, həm də erməni faşizmi üzərində əldə edilən mühüm zəfər kimi tarixdə qalacaq ki, bu da dövlətimizin, Prezidentimizin, xalqımızın sivil və mədəni dünya qarşısında böyük xidmətidir.   Konfransda çıxış edən Gənclər və İdman nazirinin müavini İntiqam Babayev də Vətən müharibəsində əldə edilən zəfərin önəminə diqqət çəkib, bu zəfərdə ölkə gəncliyinin yaxından iştirak etdiyini, dövlətimizin ərazi bütövlüyünün bərpasına böyük töhfə verdiyini qeyd edib.   Tədbirdə çıxış edən veteranlar və dövlət qurumlarının nümayəndələri də Vətən müharibəsindəki tarixi qələbənin Azərbaycan xalqının həyatında həlledici rol oynadığını, dövlətimizin gücünə güc qatdığını, onun inkişafı üçün geniş perspektivlər açdığını qeyd ediblər.Vurğulanıb ki, bu zəfər əsrlər sonra da xalqımız tərəfindən qürur və iftixar hissi ilə yad ediləcək, qəhrəmanlarımız minnətdarlıq hissi ilə anılacaq.   Konfransda Müharibə, Əmək və Silahlı Qüvvələr Veteranları Təşkilatının sədr müavini, polkovnik Cəlil Xəlilovun yekun sözü ilə çıxış edib. Sədr müavini Vətən müharibəsindəki tarixi zəfərin sadəcə Azərbaycanın deyil, bütün regionun həyatında yeni səhifə açdığına diqqət çəkib. Polkovnik Cəlil Xəlilov qeyd edib ki, bu qələbə dövlətimizin ərazi bütövlüyünü təmin etməklə yanaşı, xalqımızın özünəinam və qürur hissinin bərpası, mənəvi cəhətdən bütövləşməsi, öz güc və iradəsini bütün dünyaya nümayiş etdirməsi baxımından da mühüm əhəmiyyətə malikdir. Konfransda müxtəlif nəsillərin nümayəndələrinin iştirak etdiyini xatırladan Cəlil Xəlilov, bu qələbənin ümumxalq zəfəri olduğunu bildirib, ölkə başçısına, Azərbaycan ordusuna, şəhid və qazilərə, eləcə də hər zaman Ali Baş Komandanın və ordunun yanında olan Azərbaycan xalqına təşəkkür edib.   Tədbirin sonunda konfrans iştirakçıları adından Prezident İlham Əliyevə müraciət qəbul edilib.   Daha sonra  Ordu İdeoloji və Mədəniyyət Mərkəzinin nümayəndəsi vətənpərvərlik mövzusunda mahnılar ifa edib, xatirə şəkli çəkilib.   Seymur ƏLİYEV

Hamısını oxu
Vətən müharibəsi şəhidinin adını daşıyan küçənin açılışı olub

Cəlilabad rayonunda Vətən müharibəsi şəhidi Heydərov Qadir Ədalət oğlunun adını daşıyan küçənin açılışı olub. Rayonun mərkəzində yerləşən küçənin açılış mərasimində Cəlilabad Rayon İcra Hakimiyyətinin başçısı Rafiq Cəlilov, hüquq-mühafizə orqanlarının rəhbərləri, Rayon Veteranlar Təşkilatının üzvləri  və şəhidin valideynləri iştirak ediblər. RİH-nin başçısı Rafiq Cəlilov  çıxış edərək bildirib ki, Qadir Heydərov  11 may 1998-ci ildə Cəlilabad rayonun Əsədli kəndində doğulmuşdu.  O, orta  məktəbi 2016-cı ildə bitirib, həmin ilin oktyabr ayında Cəlilabad rayonundan hərbi xidmətə yollanıb və 2018-ci ildə xidməti başa vuraraq evə qayıdıb. Qadir Heydərov İkinci Qarabağ savaşı başlanan gündən səfərbərliyə qoşulub ön cəbhəyə gedib. Qəhrəman döyüşçü kimi Qubadlı, Zəngilan, Cəbrayıl istiqamətlərində gedən qızğın döyüşlərdə fəal iştirak edib. O, 29 oktyabr  2020-ci ildə Qubadlının  yüksəklikləri  uğrunda gedən döyüşlərdə  şəhid olub, əbədiyyətə qoşulub. Azərbaycan Respublikasının Prezidenti İlham Əliyevin müvafiq sərəncamları ilə Qadir Heydərov ölümündən sonra  "Vətən uğrunda", "Cəsur döyüşçü",  "Qubadlının azad olunmasına görə", "Cəbrayılın azad olunmasına görə" medalları  və “Vətənə xidmətə görə” ordeni ilə təltif edilmişdir. Şəhidin atası Ədalət Heydərov  göstərdikləri diqqət və qayğıya görə dövlət başçısı, Müzəffər Ali Baş Komandan İlham Əliyevə və Birinci vitse-prezident Mehriban xanım Əliyevaya öz  minnətdarlığını bildirib. Qeyd edək ki, həmin gün rayonun  Sabirabad kəndində  "Azərbaycan bayrağı" ordenli şəhid Musa Əsgərovun da adını daşıyan küçənin açılışı olub. Rayon Veteranlar Təşkilatının nümayəndələri Vətən Müharibəsi şəhidi Rəfail İşiyevin yaşadığı binanın önündə vurulmuş barelyefin açılışında da iştirak ediblər.

Hamısını oxu
Prezident İlham Əliyev Türkiyənin Xarici İşlər nazirinin başçılıq etdiyi nümayəndə heyətini qəbul edib

Azərbaycan Respublikasının Prezidenti İlham Əliyev oktyabrın 6-da Türkiyə Respublikasının Xarici İşlər naziri Mövlud Çavuşoğlunun başçılıq etdiyi nümayəndə heyətini qəbul edib. AZƏRTAC xəbər verir ki, Türkiyə nümayəndə heyətini salamlayan Prezident İlham Əliyev dedi: -Xoş gəlmisiniz, əziz Mövlud bəy, sizi salamlayıram. Şadam ki, siz gəlmisiniz. Siz Azərbaycanda dəfələrlə olmusunuz. Amma bu səfərin xüsusi önəmi var. Azərbaycan üçün o qədər də asan olmayan bir dönəmdə sizin gəlməyiniz əlbəttə ki, xüsusi önəm daşıyır. Bu, qardaş ölkənin açıq dəstəyinin təzahürüdür. Bu dəstəyə görə Azərbaycan xalqı qardaş türk xalqına və onun Prezidentinə dərin minnətdarlıq hissi ilə yaşayır. Mənim əziz qardaşım, hörmətli Prezident Rəcəb Tayyib Ərdoğan ilə bu günlərdə təmaslarım, onun çox açıq, qətiyyətli bəyanatları bütün dünyaya göstərdi ki, Azərbaycan tək deyil. Azərbaycanın yanında Türkiyə kimi dünya miqyasında böyük bir güc olan dövlət var, qardaş ölkə var. Bu dəstək bizi ruhlandırır, bizə əlavə güc verir və eyni zamanda, bölgədə sabitliyin, əmin-amanlığın təmin edilməsi üçün önəmli rol oynayır. Mən bunu bu günlər ərzində demişəm ki, Türkiyə bölgədə sabitləşdirici rol oynayır. Türkiyənin bölgədə və dünyada yalnız sülhə hesablanmış siyasəti artıq öz nəticələrini verməkdədir, həm Yaxın Şərq bölgəsində, eyni zamanda, Qafqaz bölgəsində. Ona görə Ermənistanın növbəti hücumu ilə əlaqədar bu gün yaranmış vəziyyət bir daha onu göstərir ki, Türkiyə həm regionda, həm dünyada söz sahibidir. Əlbəttə ki, bu, bizi gücləndirir, ruhlandırır. Bu gün həm bizim xalqlarımız, həm də bütün dünya görür ki, Türkiyə-Azərbaycan birliyi nə deməkdir. Əziz qardaşım, hörmətli Prezident Rəcəb Tayyib Ərdoğan ilə biz bu məsələ ilə bağlı dəfələrlə öz sözlərimizi demişik ki, Türkiyə-Azərbaycan birliyi bütün dünya üçün örnək olmalıdır. Bu gün biz real həyatda bunu göstəririk, sübut edirik və bu birliyin gələcəyi, hesab edirəm ki, bölgədə dayanıqlı sülhün təmin edilməsi üçün əsas şərt olacaqdır. Sizi bir daha salamlayıram. Xahiş edirəm ki, mənim səmimi salamlarımı hörmətli cənab Prezidentə çatdırasınız. x x x Türkiyənin Xarici İşlər naziri Mövlud Çavuşoğlu dedi: -Sağ olun, cənab Prezidentim. Əvvəlcə, bizi qəbul etdiyiniz üçün Sizə çox təşəkkür edirik. Hörmətli Prezidentimiz, qardaşınız Rəcəb Tayyib Ərdoğanın, bütün kabinetimizin, - dünən Nazirlər Kabinetində toplantımız var idi, - və türk xalqının Sizə salamlarını və uğur diləklərini gətirmişəm. Xüsusilə Zati-alinizin də vurğuladığı kimi, Türkiyənin, türk xalqının Can Azərbaycana olan dəstəyini bir daha bütün dünyaya göstərmək üçün buraya səfərə gəldim. Bu gün Sizin liderliyinizlə Azərbaycan öz torpaqlarını azad etmək üçün mübarizə aparır və buna qadirdir, gücü vardır, potensialı vardır. Əlbəttə, Türkiyə olaraq və türk xalqı olaraq, biz də nə vaxt ehtiyacı olarsa, hansı sahədə ehtiyac duyarsa Azərbaycana hər cür dəstəyi verməyə hazırıq. Bunu Prezidentimiz Ərdoğan və bizlər hər platformada izah edirik, vurğulayırıq. Azərbaycanın haqlı mübarizəsini bütün dünyaya çatdırmaq bizim də borcumuzdur. Bunu Ceyhun qardaşımla, xaricdəki bütün səfirliklərimizlə - Azərbaycanın və Türkiyənin səfirlikləri ilə birlikdə həyata keçiririk. Bu gün Sizdən alacağımız təlimatlarla daha böyük güclə bir yerdə çalışmağa davam edəcəyik. Azərbaycanın işğal edilmiş torpaqları artıq azad olunmalıdır. Azərbaycan hüquqi və mənəvi cəhətdən də haqlıdır və bu haqlı mübarizəsini hər yerdə izah edərkən bu mübarizəni də meydanda və masada birlikdə aparmağa, inşallah, davam edəcəyik. Bu gün Sizin qəbulunuzdan sonra qardaşım Ceyhunla bu məsələlərdə necə birlikdə hərəkət edəcəyimizi dəyərləndirəcəyik. Bizi qəbul etdiyiniz üçün bir daha təşəkkür edirik. Dostluq qrupumuzun sədri Şamil bəylə birlikdə gəldik. İnşallah, bugünkü toplantılarımız Azərbaycanın torpaqlarının azad edilməsi yolunda xeyirlərə səbəb olacaq. Bir daha təşəkkür edirəm, hörmətli Prezidentim. Prezident İlham Əliyev: Çox sağ olun, təşəkkür edirəm.

Hamısını oxu