Səmyar Abdullayev: “Nəhəng quruculuq prosesi göstərir ki, Şuşa qısa zamanda daha gözəl, daha qüdrətli şəhərə çevriləcək”   Məlum olduğu kimi, sentyabrın 11-də Qeyri-Hökumət Təşkilatlarına Dövlət Dəstəyi Fondunun təşkilatçılığı ilə bir qrup vətəndaş cəmiyyəti nümayəndəsinin Şuşa şəhərinə səfəri təşkil olunub.   Səfərdə iştirak edən Azərbaycan Gözdən Əlillər Cəmiyyətinin sədri Səmyar Abdullayev Veteran.gov.az-a açıqlamasında səfərlə bağlı təəssüratını bölüşüb:   “Şuşa səfəri sözün həqiqi mənasında bizdə qürur və həyacan doğuran,  bizə qeyri-adi hislər və duyğular bəxş edən bir səfər oldu. Ali Baş Komandanın rəhbərlik etdiyi şanlı Azərbaycan ordusunun qanı, canı bahasına azad etdiyi Şuşaya səfər əsnasında şəhərin tarixi yerlərini ziyarət etdik, Cıdır düzünü, Molla Pənah Vaqifin məqbərəsini, Bülbülün, Üzeyir bəyin, Xurşidbanu Natəvanın heykəllərini, Yuxarı Gövhər ağa məscidini ziyarət etdik. Məlum səfər əsnasında ermənilərin 30 ilə yaxın müddət ərzidə Azərbaycanın tarixi mədəniyyət mərkəzi, hazırkı mədəniyyət paytaxtı olan Şuşada törətdikləri vəhşiliklərə şahid olmaq bizim üçün nə qədər ağır olsa da, dövlətimizin qısa zaman ərzində Şuşada həyata keçirdiyi təmir-bərpa və yenidənqurma işləri bizdə bir o qədər böyük fərəh doğurdu. Məlumat üçün qısaca qeyd edim ki, Prezident İlham Əliyevin diqqət və qayğısı sayəsində Şuşada mərkəzi küçələri təmir edilib, tarixi abidələrin, memarlıq nümunlərinin, sosial obyektləri bərpası prosesi uğurla davam etdirilir. Görülən işlərin miqyası onu söyləməyə əsas verir ki, Şuşa qısa zamanda daha gözəl, daha qüdrətli, daha möhtəşəm bir şəhərə çevriləcək”.   Səmyar Abdullayev qeyd edib ki, şəhəri gəzdikcə, onun təbiəti ilə yaxından tanış olduqca əsgərlərimizin qəhrəmanlığına, onların əzminə heyran olmamaq mümkün olmur:   “Yüksək dağlıq relyefdə yerləşən, möhtəşəm dağlar, sıx meşələrlə əhatə olnan Şuşanı dolaşıb, onun ecazkar təbiəti ilə yaxından tanış olduqca, istər-istəməz 44 günlük Vətən müharibəsində Şuşanı azad edən hərbçilərimizin döyüş əzmi, qəhrəmanlığı, cəsarət və rəşadəti yada düşür. Şuşanın sıldırım qayalarına, sərt dağlarına tamaşa etdikcə insan güllə və mərmi yağışı altında sərt qayaları dırmaşaraq şəhərə daxil olan, bıçaq və yalın əllə düşmənə divan tutan hərbçilərimizin necə böyük qəhrəmanlığa imza atdığını bir daha dərk edir. Və bu qavrayış fonunda onu da anlayırsan ki, belə cəsur, yenilməz, fədakar oğullara malik olan vətən heç vaxt məğlub ola bilməz”.   Səmyar Abdullayevin sözlərinə görə, səfər əsnasında Şuşa ilə bağlı yeni məlumat və təəssüratlara malik olan iştirakçılar erməni vəhşiliyinin ifşa edilməsində daha ciddi səy göstərməli, dünya ictimaiyyətini, beynəlxalq aləmi erməni vandalizmi haqqında daha ətraflı məlumatlandırmalıdır:   “Məlum səfər hər bir iştirakçının Şuşa, onun keçmişi və bugünü ilə bağlı təəsüratının zənginləşməsi, şəhərlə bağlı daha ətraflı məlumata sahib olması baxımından mühüm rol oynadı. Hesab edirəm ki, həm QHT, həm də media nümayəndələri səfər əsnasında şahidi olduğu hadisə və yeniliklərdən – erməni vəhşiliyindən, onun şəhərin  sosial-mədəni həyata vurduğu zərbədən, habelə işğaldan sonra Şuşada həyata keçirilən nəhəng quruculuq işlərindən beynəlxalq media platformasında geniş bəhs etməli, dünya ictimaiyyətini bu haqda ətraflı şəkildə məlumatlandırmalıdır. Dünya erməni vəhşiliyi haqqında da, Azərbaycan xalqının qurmaq-yaratmaq əzmi haqqında da geniş informasiya almalı, erməni faşizminin dağıdıcı xisləti ilə müqayisədə Azərbaycan xalqının qurucu-yaradıcı təbiəti haqqında daha dolğun məlumata sahib olmalıdır”.   Seymur ƏLİYEV        

Veteran.gov.az xəbər verir ki, sentyabrın 13-də Suraxanı rayonunda Vətən müharibəsinin növbəti şəhidi, əsgər Manafov Osman Natiq oğlunun əziz xatirəsinin əbədiləşdirilməsi məqsədilə Suraxanı Rayon İcra Hakimiyyəti tərəfindən inşa edilən bulaq-abidə kompleksinin açılışı olub.   Açılışda Suraxanı Rayon İcra Hakimiyyətinin başçısı Əziz Əzizov, Azəriqaz” İstehsalat Birliyinin baş direktoru Ruslan Əliyev və Birliyin əməkdaşları, RİHB-nin müavinləri, şöbə müdirləri, Bülbülə qəsəbə inzibati ərazi dairəsi üzrə nümayəndəsi və bələdiyyə sədri, Suraxanı Gənclər və İdman İdarəsinin rəisi, Azərbaycan Vətən Müharibəsi Veteranları İctimai Birliyinin Suraxanı rayon şöbəsinin sədri, “Canlı İşıqfor”un Vətənpərvərlik qrupu və gənclər, Vətən Müharibəsinin Şəhid ailələri və qazilər, eləcə də Şəhidimizin ailə üzvləri və yaxınları iştirak etmişlər.   Tədbirdə çıxış edən RİH başçısı Əziz Əzizov Prezident, Ali Baş Komandan cənab İlham Əliyevin rəhbərliyi ilə ötən ilin sentyabrın 27-də başlanan və zəfərlə başa çatan Vətən müharibəsində qazanılan qələbənin tarixi əhəmiyyətindən bəhs edərək bildirmişdir ki, həyata keçirilən düşünülmüş siyasətin və vaxtında atılan addımların nəticəsidir ki, biz bu gün qalib ölkəyik. Ölkə başçımız dahi siyasətçi, müdrik dövlət xadimi ulu öndər Heydər Əliyevin layiqli varisi kimi onun vəsiyyətini həyata keçirdi və arzuladığı Qarabağı azad etdi. O, həm də bütün dünyaya sübut etdi ki, Azərbaycan xalqı qəhrəman, məğrur xalqdır. Şəhidlərimizin qanının yerdə qalmadığını vurğulayan RİH başçısı həmçinin qeyd etdi ki, ölkəmizin ərazi bütövlüyünü bərpa edən dövlət Rəhbərimiz Azərbaycan xalqının qəhrəmanlıq salnaməsini yazdı.   44 günlük Vətən müharibəsində öz canından keçərək şəhidlik məqamına ucalan Osman Manafov da adını əbədiyaşarların cərgəsinə yazdı. Ölkəmizin ərazi bütövlüyünün bərpa olunması üçün başlanan Vətən müharibəsi zamanı Hadrut qəsəbəsinin və Xocavəndin azadlığı uğrunda gedən döyüşlərdə savaşan Osman Manafov Xocavənd döyüşləri zamanı şəhid olub. İllər keçsə də, gələcək nəsillər Osman kimi vətən oğullarımızı hər zaman böyük minnətdarlıqla yad edəcəklər. Qeyd edək ki, Osman Manafov ölümündən sonra Azərbaycan Respublikası Prezidentinin müvafiq Sərəncamları ilə Azərbaycan Respublikasının ərazi bütövlüyünün təmin edilməsi uğrunda döyüş əməliyyatlarında iştirak etdiyinə və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə “Vətən uğrunda” medalı, Azərbaycan Respublikasının Xocavənd rayonunun işğaldan azad edilməsi uğrunda aparılmış döyüş əməliyyatlarında iştirak edərək şəxsi igidlik və şücaət nümayiş etdirdiyinə görə “Xocavəndin azad olunmasına görə” medalı ilə təltif edilmişdir.  

Veteran.gov.az xəbər verir ki, 27 sentyabr “Anım Günü”nə həsr olunmuş “Misilsiz cəsarət” adlı rəsm sərgisi keçiriləcək.   Azərbaycan Respublikasının Mədəniyyət Nazirliyi, “ASAN xidmət”, Azərbaycan Rəssamlar İttifaqı, Azərbaycan Dövlət Rəsm Qalereyası, Xətai Sənət Mərkəzinin və “ASAN Könüllülük Məktəbi”nin təşkilatçılığı ilə 27 sentyabr “Anım Günü”nə həsr olunmuş “Misilsiz cəsarət” adlı rəsm sərgisi keçiriləcək.   Sərginin ekspozisiyasında Azərbaycan rəssamları və heykəltəraşlarının müxtəlif üslub və janrlarda Vətən Müharibəsi qəhrəmanlarının xatirəsini əbədiləşdirdiyi əsərləri yer alacaqdır. Sərgidə iştirak etmək istəyən rəssamlar 20 sentyabr tarixinədək mövzuya uyğun rəsmlərinin keyfiyyətli fotosunu, əsərin adını, ölçüsünü və texnikasını, öz ad, soyadı və əlaqə nömrələri ilə birgə resmqalereya@gmail.com ünvanına göndərə bilərlər.   Sərgi Nazirlər Kabineti yanında Operativ Qərargahın COVİD-19 pandemiyası ilə əlaqədar qəbul etdiyi karantin qaydalarına uyğun keçiriləcək.   Ətraflı məlumat: +994 77 717 33 37      

Cəlil Xəlilov: “Bizə bu qüruru yaşatdığı üçün dövlətimizə, Ali Baş Komandanımıza təşəkkür edirəm”   Məlum olduğu kimi, sentyabrın 11-də bir qrup QHT təmsilçisi Şuşaya səfər edib, şəhərdə aparılan qurucluq işləri ilə tanış olub.   Səfərlə bağlı veteran.gov.az-a açıqlama verən Müharibə, Əmək və Silahlı Qüvvələr Veteranları Təşkilatının sədr müavini, ehtiyatda olan polkovnik Cəlil Xəlilov bu cür səfərlərin mühüm əhəmiyyətə malik olduğunu vurğulayıb:   “Şuşaya səfər hər bir vətəndaşımızda qürur və iftixar hissi doğurur. Mən ilk növbədə bizə bu qüruru yaşatdığına görə dövlətimizə, Ali Baş Komandanımıza təşəkkür edir, şəhdilərimizin ruhu qarşısında ehtiramla baş əyirəm. Biz bu torpaqları ordumuzun və Ali Baş Komandanımızın əzmkarlığı, şəhidlərimizin və qazilərimizin qəhrəmanlığı, xalqımızın fədakarlığı sayəsində nail olduq.   Qeyri- Hökumət Təşkilatlarına Dövlət Dəstəyi Agentliyinin dəstəyilə Şuşaya təşkil olunan səfər əsnasında şəhərin tarixi yerlərini ziyarət etdik, erməni vandalizminin nəticələri ilə yanaşı, dövlətimiz tərəfindən həyata keçirilən nəhəng tikinti-quruculuq işləri ilə tanış olduq. Səfərdə iştirak edən hər bir şəxs görülən işlər, həyata keçirilən layihələrlə tanış olduqca əmin olur ki, Azərbaycan dövləti qısa bir zamanda Şuşada sözün həqiqi mənasında möcüzə gerçəkləşdirib. Şəhər və şəhər ətrafında yol-nəqliyyat və sosial infrastrukturun bərpası ilə yanaşı, şəhərin tarixi-mədəni simasının bərpası, erməni vəhşiliyinin izlərinin ortadan qaldırılması istiqamətində ciddi addımlar atıb. Hansı ki, bu fəaliyyət bu gün də uğurla davam etməkdədir.   Şuşa Azərbaycan xalqının qədim mədəniyyət mərkəzi, tarixi qürur, yenilməzlik simvoludur və hər zaman məhz belə qalacaq”.   Seymur Əliyev  

Veteran.gov.az xəbər verir ki, Mənəvi Dəyərlərin Təbliği Fondu (MDTF) tərəfindən  iyunun 25-də elan edilən müsabiqəyə müraciətlərin qəbulu 25 avqust tarixində başa çatıb. Məlumat üçün bildirək ki, sosial şəbəkə (Facebook, Twitter, Instagram) istifadəçiləri arasında keçirilən müsabiqəyə 30 iştirakçı qoşulub. Fondun müəyyən etdiyi həştəqlərlə sosial şəbəkə istifatəçiləri tərəfindən paylaşılan statuslar əhatəlilik, tutarlılıq, kreativlik və ictimai rəğbət meyarları əsasında aşağıda adları qeyd edilən müstəqil ekspertlərin iştirakı ilə yaradılmış Komissiya tərəfindən qiymətləndirilmiş və qaliblər müəyyən olunmuşdur:   1) Anar Məcidzadə - Azərbaycan Respublikası Dini Qurumlarla İş üzrə Dövlət Komitəsinin əməkdaşı, Azərbaycan Yazıçılar Birliyinin üzvü, Azərbaycan Jurnalistlər Birliyinin üzvü   2) Sevinc Cəfərova - 525-ci qəzetin xüsusi müxbiri, jurnalist   3) Fərəh Rəsulova – Müstəqil ekspert   Qalibləri təqdim edirik:   1-ci yer – Fidan Nəsirli   2-ci yer – Elçin Bayramlı   2-ci yer – Mina Rəşid   3-cü yer – Lalə Mehralı   3-cü yer – Ramin Xudayev   3-cü yer – Səxavət Hidayətoğlu   Həvəsləndirici yer - Bədiyyə Sadıqova   Həvəsləndirici yer - Şəhadət Abbasov   Həvəsləndirici yer - Vüsalə Fətullayeva   Həvəsləndirici yer - Kənan Həmzəoğlu   Həvəsləndirici yer - Kənan Bağırov

Görüşdə şəhid və qazi ailələrinin üzvləri də iştirak edib   Veteran.gov.az xəbər verir ki, Tovuz Rayon İcra Hakimiyyətinin başçısı Məmməd Məmmədov 600-dən yuxarı bal toplayaraq ali məktəblərə qəbul olunaraq tələbə adını qazanan gənclərlə, şəhid və qazi ailələrinin üzvləri ilə görüş keçirib. Azərbaycan Respublikasının Prezidenti cənab İlham Əliyevin və Azərbaycan Respublikasının Birinci-vitse prezidenti Mehriban xanım Əliyevanın təhsilə, gənc nəslin hərtərəfli yetişdirilməsi üçün göstərdiyi mühüm diqqət və qayğının nəticəsi olaraq əldə olunmuş yüksək nəticə münasibətilə valideynləri və təhsil ictimaiyyətini təbrik edən RİH başçısı Məmməd Məmmədov, bu istiqamətdə işlərin yüksələn xətt üzrə davam etdiriləcəyini bir daha diqqətə çatdırıb.   Sonda tələbə adını qazanan şəhid və qazi ailələrinin üzvlərinə, 600-dən yuxarı bal toplayaraq ali məktəblərə qəbul olunan tələblərə rayon İcra Hakimiyyətinin Fəxri Fərmanları və qiymətli hədiyyələri təqdim olunub.  

Veteran.gov.az xəbər verir ki, Yeni Azərbaycan Partiyası Gənclər Birliyinin sədri Bəxtiyar İslamov paytaxtın Yasamal, Binəqədi, Nərimanov, Xəzər, Qaradağ, Xətai, Sabunçu, Nizami, Səbail, Suraxanı, Nəsimi, Pirallahı rayon təşkilatlarının, o cümlədən Sumqayıt şəhər, Abşeron, Şuşa, Zəngilan və Qubadlı rayon təşkilatlarının fəal gəncləri ilə görüşüb.   Görüşdə Bəxtiyar İslamov YAP Gənclər Birliyinin yeni formalaşmış heyəti, fəaliyyət istiqamətləri, o cümlədən həyata keçirdiyi işlərdən bəhs edib. Yeni Azərbaycan Partiyasının VII Qurultayında Prezident cənab İlham Əliyev tərəfindən Azərbaycan gənclərinin qarşısına qoyulmuş tapşırıq və hədəflərdən danışan Bəxtiyar İslamov bildirib ki, YAP Gənclər Birliyi yalnız partiyamızın sıralarında təmsil olunan gənclərin deyil, bütün Azərbaycan gənclərinin birliyi olmaq istiqamətində fəaliyyət göstərməyi başlıca məqsəd seçib. Bu istiqamətdə cəmiyyətdə fərqli baxışları olan gəncləri əhatə etməklə onlar arasında kommunikasiya qurmaq üçün ardıcıl tədbirlər keçirilir, bitərəf gənclər layihələrə aktiv şəkildə cəlb olunur. B.İslamov Azərbaycan gənclərinin bilikli, dünyagörüşlü, müasir yeniliklərə bələd, o cümlədən öz milli-mənəvi dəyərlərimizə bağlı, vətənpərvər ruhda yetişməsinin YAP Gənclər Birliyinin fəaliyyətinin əsas istiqamətlərindən biri olduğunu vurğulayıb.   Görüşdə qarşıda duran vəzifələrin layiqincə və yüksək səviyyədə yerinə yetirilməsi üçün gənclərin üzərinə düşən vəzifələr müzakirə edilib.   Görüş tədbir iştirakçılarını maraqlandıran sualların cavablandırılması ilə davam edib.  

II Dünya müharibəsində Belarus cəbhəsində döyüşmüş azərbaycanlılar haqqında kitab hazırlanması məqsədi ilə 6-11 sentyabr 2021-ci il tarixlərində Belarus nümayəndə heyətinin Azərbaycan Respublikasına səfəri planlaşdırılıb.   Qeyd edək ki, bu səfər proqramı çərçivəsində Belarus jurnalist yazarları Larisa Kuçerova və Dmitriy Koşevar ilə AMEA Milli Azərbaycan Tarixi Muzeyində görüş keçirilib. Görüşdə qeyd olunan kitabın hazırlanması ətrafında müzakirələr aparılıb. Baş direktor, akademik N.Vəlixanlı Milli Azərbaycan Tarixi Muzeyinin kitabın hazırlanmasında dəstək göstərəcəyini qeyd etdi. Müzakirə çərçivəsində muzeyin fondlarında mövzu ilə əlaqədar bir çox materialların olduğu və həmin materialların kitabın hazırlanması zamanı istifadə olunacağı vurğulandı.   Müzakirədən sonra Larisa Kuçerova II Dünya müharibəsi dövründə azərbaycanlıların Belarus uğrunda qəhrəmancasına döyüşdüyünü və Belarus xalqının bunu heç zaman unutmayacağını vurğuladı.   Həmçinin qonaqlara Muzeyin nəfis tərtibatlı nəşrləri təqdim olundu. Sonda qonaqlar Muzeyin ekspozisiyası, "Anadır arzulara hər zaman Qarabağ" və “Nizami Gəncəvi və Azərbaycan Atabəyləri dövləti” adlı sərgiləri ilə tanış oldular.   Mənbə: http://azhistorymuseum.gov.az/az/news/3556?fbclid=IwAR0UEzqr80V74-G6zPfJ5s_Z47u_paMYeeMkmMjTlXTDqLxfnk9x-s-pGqU

Sentyabrın 4-də Moskva ətrafında yerləşən “Patriot” parkında “Beynəlxalq Ordu Oyunları-2021” yarışlarının təntənəli bağlanış mərasimi keçirilib. Azərbaycan hərbçiləri bu yarışlar çərçivəsində Rusiyada “Tank biatlonu” və “Mədəniyyət Ordusu”, İranda “Dəniz kuboku”, Qazaxıstanda “Artilleriya atəşinin ustaları” müsabiqələrində iştirak edərək əsl peşəkarlıq sərgiləyiblər.   AZƏRTAC xəbər verir ki, bununla bağlı açıqlama verən Azərbaycan Respublikası Müharibə, Əmək və Silahlı Qüvvələr Veteranları Təşkilatının sədr müavini, polkovnik Cəlil Xəlilov bu təlimlərin ordumuzun peşəkarlığının artırılması baxımından mühüm əhəmiyyətə malik olduğunu bildirib. O qeyd edib ki, hərbi təlimlər ordumuzun döyüş hazırlığının daim yüksək səviyyədə qorunub saxlanılması və daha da təkmilləşdirilməsi baxımından önəmlidir. Bu baxımdan ordumuzun “Beynəlxalq Ordu Oyunları-2021” yarışlarında iştirakı olduqca vacibdir. Azərbaycan dünyanın müxtəlif yerlərində keçirilən hərbi yarışlarda, beynəlxalq ordu oyunlarında müntəzəm iştirak edir. İstər Rusiya, Qazaxıstan və digər post-sovet ölkələrində, istərsə də Türkiyə və digər NATO dövlətlərində keçirilən təlimlərdə Azərbaycan hərbçiləri iştirak edərək yüksək nəticələr qazanırlar. Bu təlimlərdə hərbçilərimizin əldə etdiyi nəticələr Azərbaycan Silahlı Qüvvələrinin gücündən, onun peşəkarlığından xəbər verir və bizdə haqlı olaraq ordumuzla qürur duyuruq. Polkovnik vurğulayıb ki, Azərbaycan Ordusu dəniz təlimlərində də mütəmadi iştirak edir, bu sahədəki hərbi yenilikləri sürətlə mənimsəyir. “Beynəlxalq Ordu Oyunları-2021” yarışları çərçivəsində hərbçilərimiz İranda “Dəniz kuboku” yarışlarında da yüksək peşəkarlıq nümayiş etdirib. Ordumuzun “Dəniz kuboku” yarışlarındakı qazandığı nəticə ölkəmizin dəniz sərhədləri təhlükəsizliyinin ciddi şəkildə qorunduğunu bir daha göstərdi. Azərbaycan Silahlı Qüvvələrinə daxil olan bütün qoşun növləri, hərbi birliklər yüksək döyüş hazırlığına malikdir və bu hazırlığın qorunub saxlanılmasına, daha da inkişaf etdirilməsinə xüsusi diqqət yetirilir.  Azərbaycan Ordusunun beynəlxalq müsabiqə və ordu oyunlarında əldə etdiyi yüksək nəticələrdən Ermənistan və onun havadarlarının da dərs çıxarmalı olduğunu bildirən Respublika Veteranlar Təşkilatının sədr müavini deyib: “44 günlük Vətən müharibəsində ordumuzun əldə etdiyi parlaq zəfər onun yüksək döyüş hazırlığına əyani sübut idi. Bu günlərdə keçirilən ordu oyunlarında qazanılan nəticələr də həmin döyüş hazırlığının uğurla qorunub saxlanıldığını göstərir. Hesab edirəm ki, ordumuzun beynəlxalq hərbi yarışlarda göstərdiyi nəticə bu gün də təxribatlardan əl çəkmək istəməyən Ermənistan və onun havadarlarına dərs olmalıdır. Ordumuzun bu təlimlərdəki nəticələri bir daha “Dəmir yumruğ”un yerində olduğunu, düşmənlərə hər zaman zərbə endirməyə hazır olduğunu göstərir. Əgər Ermənistan Azərbaycan tərəfinin xəbərdarlıqlarından nəticə çıxarmasa, 10 noyabr bəyanatının icrasına süni şəkildə problem yaratmaqda davam etsə, o zaman bu zərbə qaçılmaz ola bilər”.  Azertag.az (https://azertag.az/xeber/1870305 )  

Azərbaycan, Türkiyə, Pakistan arasında hərbi sahədə əməkdaşlıq güclənir   Hərbi təlimlər göstərir ki, istənilən təhdid və təhlükə ilə bağlı bu dövlətlərin hamısı vahid mövqe nümayiş etdirəcək, vahid cəbhədə dayanacaqlar   Azərbaycan, Türkiyə və Pakistan xüsusi təyinatlılarının birgə təlimi keçiriləcək. Sentyabrın 6-da Müdafiə Nazirliyinin rəhbərliyi Azərbaycan, Türkiyə və Pakistan xüsusi təyinatlı qüvvələrinin nümayəndələrinin iştirakı ilə beynəlxalq təlimin keçiriləcəyi ərazi ilə tanış olub. Nazirliyin mətbuat xidmətindən verilən məlumata görə, nazirə təlimə hazırlıq prosesi və digər təşkilati məsələlərlə bağlı məruzə edilib. Rəhbərlik təlimin yüksək səviyyədə təşkili və keçirilməsi üçün müvafiq göstərişlər verib. Birgə təlimlər “Üç qardaş - 2021” adı ilə həyata keçiriləcək.    Azərbaycan, Türkiyə və Pakistan ordusunun xüsusi təyinatlılarının iştirakı ilə birgə təlimlərin mühüm əhəmiyyətə malik olduğunu deyən ehtiyatda olan polkovnik, Respublika Veteranlar Təşkilatının sədr müavini Cəlil Xəlilov vurğulayıb ki, bu təlimlər hər şeydən öncə hərbi baxımdan son dərəcə önəmlidir: “Bildiyiniz kimi, Azərbaycanla Türkiyə və Pakistan arasında hərbi sahədə ciddi əməkdaşlıq mövcuddur və hər iki dövlət 44 günlük Vətən müharibəsində ölkəmizə açıq dəstəklərini ifadə ediblər. Vətən müharibəsində Azərbaycana həm diplomatik, həm də mənəvi baxımdan ciddi dəstək verən Türkiyə və Pakistan dövlətlərinin bu dəstəyi xalqımız tərəfindən hər zaman dərin minnətdarlıq hissi ilə yad ediləcək. Təsadüfi deyil ki, Prezident İlham Əliyev öz çıxışlarında dəfələrlə Trükiyə və Pakistanın Vətən müharibəsi dönəmində Azərbaycana verdiyi mənəvi və diplomatik dəstəyə diqqət çəkib.   Buna görə hər iki dövlətə öz minnətdarlığını bildirib. Azərbaycan Türkiyə və Pakistanla ikitərəfli və üçtərəfli təlimlər fonunda bu ölkələrlə əməkdaşlığı daha da genişləndirməkdə maraqlıdır. Qardaş Türkiyə NATO dövləti kimi hərbi baxımdan dünyanın ən güclü dövlətlərindən biridir. Son illər raket texnologiyasını sürətlə inkişaf etdirən Pakistan da müasir dünyanın hərbi baxımdan qabaqcıl dövlətlərindən biri hesab edilir.   Hər iki dövlət mürəkkəb coğrafi relyefdə, xüsusilə də dağlıq və yüksək dağlıq ərazilərdə döyüşmək, anti-terror əməliyyatı aparmaq baxımından zəngin təcrübəyə malikdirlər. 44 günlük Vətən müharibəsində qısa zamanda Qarabağ və ətraf əraziləri düşməndən azad edən Azərbaycan ordusu bu sahədə böyük səriştə və peşəkarlığa malik olduğunu bütün dünyaya sübut etdi.   İndi hər üç qardaş dövlət birgə təlimlərə hazırlaşır. Bu təlimlər ordumuzun döyüş hazırlığını yüksək səviyyədə saxlaması, müasir hərbi yenilikləri sürətlə mənimsəməsi, özünü rəqabət mühitində inkişaf etdirməsi baxımından olduqca əhəmiyyətlidir”.   C.Xəlilov əlavə edib ki, keçirilən təlimlərin siyasi baxımdan da mühüm əhəmiyyəti var:   “Azərbaycan, Türkiyə və Pakistanla birlikdə keçiriləcək hərbi təlimlər hər şeydən öncə üç dövlətin qardaşlığından, bir-birinə olan sevgi və bağlılığından xəbər verir. Bu təlimlər göstərir ki, 44 günlük Vətən müharibəsində olduğu kimi, bundan sonra da istənilən təhdid və təhlükə ilə bağlı bu dövlətlərin hamısı vahid mövqe nümayiş etdirəcək, vahid cəbhədə dayanacaqlar. 10 noyabr Bəyanatının şərtlərinə əməl etmək istəməyən, vaxtaşırı müxtəlif təxribatlarlar həyata keçirməklə bölgədə sülh və sabitliyi pozmağa çalışan Ermənistan rəhbərliyinin də birgə təlimlərdən lazımi nəticə çıxarması vacibdir. Ermənistan və ona havadarlıq edən qüvvələr anlamalıdır ki, qüdrətli Azərbaycana dəstək olan qüdrətli dost ölkələr, qardaş dövlətlər mövcuddur. Bu dövlətlər onlara yönəlik hər cür təhlükəni dəf etməyə qadirdilər. Odur ki, Ermənistan Azərbaycana qarşı təxribatlara son qoymalı, öz məğlubiyyəti ilə barışmalı və regionda vəziyyəti mürəkkəbləşdirən addımlar atmaqdan çəkinməlidir. Əks təqdirdə, heç bir qüvvə Ermənistanı yeni və daha ağır məğlubiyyətdən xilas edə bilməyəcək”.   Sherg.az (https://sherg.az/x%C9%99b%C9%99r/174557 )

Veteran.gov.az xəbər verir ki, dünən millət vəkili Sadiq Qurbanov Siyəzən rayonunda icra başçısı Novruz Novruzovla birlikdə təhsil işçiləri ilə görüşüb. Görüş əsnasında rayon məktəblilərinin qəbul imtahanında göstərdikləri uğurlu nəticələrə toxunulub, yeni tədris ilinə hazırlıq müzakirə olunub. Pandemiya şərtləri daxilində keçirilən görüşdə vurğulanıb ki, rayondakı bütün məktəblər yeni tədris ilinə tam hazırdır. Millət vəkili bütün təhsil işçilərini yeni tədris ilinin başlanması münasibəti ilə təbrik edib, onlara uğurlar arzulayırıb.    

Tamam Cəfərova: “Bu hava limanının inşası hərbi baxımdan da mühüm əhəmiyyətə malikdir”   “Füzuli hava limanının inşası dövlətimizin həm iqtisadi qüdrətindən, həm də siyasi əzmindən xəbər verir”.   Bunu Veteran.gov.az-a açıqlamasında millət vəkili Tamam Cəfərova bildirib. Millət vəkili bildirib ki, bu tarixi uğur dövlətimizin qarşısına qoyduğu bütün hədəflərə çatmaqda nə qədər prinsipial olduğunu göstərdi:   “Ermənistanın 30 ilə yaxın müddət ərzində işğal altında saxladığı torpaqlarımızda böyük dağıntı və talanalr həyata keçirdiyi məlumdur. Bri qərinəyə yaxın müddət ərzində işğalda saxladığı ərazilərin ona aid olduğunu iddia edən, buna rəğmən daşı-daş üstündə qoymayan Ermənistandan fərqli olaraq, Azərbaycan müharibə başa çatar-çatmaz Prezident İlham Əliyevin rəhbərliyi ilə bu torpaqlarda böyük quruculuq işlərinə start verdi. Füzuli hava limanının inşası da bu mühüm layihələrdən biridir. Azərbaycan bu layihəni uğurla başa çatdırmaqla sadəcə Ermənistan və onun havadarlarına deyil, eləcə də bütün dünyaya sübut etdi ki, iqtisadi baxımdan güclü olmaqla yanaşı, siyasi baxımdan da son dərəcə qətiyyətlidir və qarşısna qoyduğu bütün məqsədlərə çatmaqda qərarlıdır”.   Millət vəkili qeyd edib ki, post-müharibə dönəmi Azərbaycan və Ermənistan iqtisadiyyatı arasındakı fərqi bir daha ortaya qoydu:   “Post-müharibə dönəmindən dərhal sonra işğaldan azad edilən ərazilərdə böyük bərpa-tikinti və quruculuq işlərinə start verən Azərbaycan, eyni vaxtda demək oalr ki, azad edilən bütün rayonlarda böyük layihələr həyata keçirməkdədir. Hansı ki, dünya təcrübəsi sübut edir ki, böyük maliyyə resursu tələb edən müharibədən sonra böyük iqtisadi layihələr reallaşdırmaq hər bir dövlət üçün kifayət qədər çətin olur. Azərbaycan isə müharibədən sonra böyük maliyyə vəsaiti tələb edən mühüm iqtisadi layihələrin icrasını həyata keçirməklə, iqtisadi baxımdan nə qədər güclü olduğunu bir daha sübut etdi. Bu gün işğaldan azad edilən ərazilərdə böyük layihələr imza atan Azərbaycanın uğuruları fonunda Ermənistan tərəfinin vəziyyəti xüsusilə acınacaqlı görünür. Nəinki hansısa iqtisadi layihə həyata keçirməyə, hətta yaşlı vətəndaşlarının pensiyasını, sosial müavinətini ödəməyə gücü olmayan Ermənistan, iqtisadi-maliyyə baxımından da iflic durumdadır. Ermənistan vətəndaşları açıq şəkildə Azərbaycan vətədnaşlığını qəbul etməyə hazır olduqlarını bildirir, bunun qarşılığında sadəcə iş tələb edirlər. Çünki sadə ermənilər də anlayır ki, Azərbaycan dövlətinin iqtisadi gücü bütün sosial problemləri yüksək səviyyədə həll etməyə, vətəndaşların sosial rifahını yüksəltməyə qadirdir”.   Tamam Cəfərova bildirib ki, Füzuli hava limanı bölgədə iqtisadiyyat və turizmin inkişafına təkan verməklə yanaşı, ölkəmizin hərbi potensialını da gücləndirəcək:   “Füzuli hava limanının istifadəyə verilməsi heç şübhəsiz bölgədə iqtisadiyyat və turizmin canlanmasına böyük təkan verəcək. Hava limanı Füzuli rayonuna gediş-gəlişi asanlaşdırmaqla yanaşı, yük daşınmalarını da sürətləndirəcək. Hava limanının fəaliyyəti fonunda Füzuli rayonu və ətraf ərazilərdə sənaye və kənd təsərrüfatının, o cümlədən turizmin sürtətli inkişafına şahid olacağıq.   Bununla yanaşı, Füzuli hava limanının fəaliyyəti Azərbaycanın hərbi potensialını da gücləndirəcək. Çünki lazımi məqamlarda bu hava limanından hərbi mqəsədlər üçün də istifadə etmək mümkün olacaq ki, bu da regionda baş verən hərbi proseslərə çevik reaksiya vermək, vətəndaşların təhlükəsizliyini təmin etmək, prosesləri qabaqlamaq baxımından olduqca vacibdir.   Bir sözlə, Füzuli hava limanının inşası dövlətimizin, Prezident İlham Əliyevin böyük uğurudur və proseslərin gedişatı göstərir ki, biz yaxın gələcəkdə yeni-yeni uğrulara, tarixi nailiyyətlərə şahid olacağıq”.   Seymur ƏLİYEV